Os académicos fixeron unha semblanza emocionada do autor homenaxeado?este 17 de maio
18 may 2008 . Actualizado a las 02:00 h.Xosé María Álvarez Blázquez recibiu onte o homenaxe da Real Academia Galega no Día das Letras Galegas, dedicadas a un persoeiro de brillante traxectoria en numerosos ámbitos da cultura, na cidade na que aínda que non naceu, xa que o fixo en Tui, viviu a meirande parte da súa prolífica vida. A sesión plenaria que a RAG celebrou onte no auditorio do Concello de Vigo contou coa presenza da metade dos seus membros numerarios. Os encargados de lembrar a súa figura foron Darío Xohán Cabana, Víctor Fernández Freixanes e Xosé Luís Méndez Ferrín. O primeiro en tomar a palabra foi Darío Xohán Cabana, que artellou o seu discurso en torno á admiración por Álvarez Blázquez, que foi xefe seu e sen embargo amigo en Edicións Castrelos. O escritor lucense marcou a pauta reivindicativa nun discurso cargado de sentimento pero tamén de demandas. Na súa disertación reclamou a celebración dun congreso multidisciplinar «que infelizmente aínda non se convocou», para abondar na frondosa e poliédrica figura do homenaxeado. «Sería fermoso», dixo, que a Universidade de Vigo convocase un acto no que participasen estudosos, editores, historiadores, escritores, xornalistas ou filatélicos», facetas, todas elas, e máis, nas que destacou Xosé María Álvarez Blázquez.
Darío Xohán Cabana fixo un percorrido intenso pola súa obra, dende a súa faceta como arqueólogo, seguindo pola de libreiro e editor, ata un longo paseo razoado pola súa produción escrita, facendo unha parada emocionada en Roseira do teu mencer , o libro de poemas que escribiu tras a morte da filla que chamaban Colorín e que morreu de nena.
Débeda gozosa
O académico lembrou tamén a «débeda gozosa» que a cidade de Vigo ten con Álvarez Blázquez, e que «nunca poderá ser pagada», con relación á súa actividade como historiador, arqueólogo pioneiro e editor senlleiro na cidade. Segundo o autor, o traballo como editor de Álvarez Blázquez é «o maior dos innumerables servizos que ofreceu á patria».
Tanto Cabana coma Ferrín, Freixanes e outros membros da RAG referíronse á proposta da familia de crear unha fundación en torno á figura deste autor, unha iniciativa que, segundo asegurou o presidente da Real Academia Galega, Xosé Ramón Barreiro, conta coa «mellor disposición desta institución».
Celso Álvarez Cáccamo, un dos fillos do escritor homenaxeado, explicou que o proxecto da fundación sería fundamental para que o arquivo -que a día de hoxe permanece no domicilio da viúva de Álvarez Blázquez- estivese adecuadamente catalogado, inventariado, preservado e dixitalizado para estudos posteriores, e podería incluso servir para acoller o legado dos antepasados de Álvarez Blázquez. O fillo do autor lembrou tamén que o seu pai tiña «unha amplísima correspondencia, así como 130 carpetas organizadas e outro material sen catalogar con escritos, documentos históricos da cidade de Vigo, artigos e unha importante biblioteca. Álvarez Cáccamo, ademais, manifestou que, por lóxica, a sede da futura fundación debería estar en Vigo.