As novidades do Culturgal non afectarán só á parte visible desta feira das industrias culturais galegas. Segundo o presidente dos editores galegos, haberá cambios organizativos. Entre eles, unha maior participación directa da Consellería de Cultura nas actividades da feira.
A ampliación presupostaria e a maior presenza da consellería implicará tamén unha programación que ten que medrar, segundo o presidente dos editores, de maneira que todos os sectores presentes na feira amplíen as súas actividades, ben sexan concertos, presentacións, obradoiros ou presenza expositiva.
Para Sanmartín isto obriga a utilizar unha estrutura organizativa na que estean presentes de maneira efectiva todos os sectores da cultura galega.
Segundo o presidente dos editores, porase en marcha unha comisión que agrupará a representantes de cada unha das comisións que deberán traballar en cada un dos sectores culturais que participan na feira. Sanmartín considera que este sistema será máis eficaz e flexible.