A aparición do libro de Darío Xohán Cabana non é a única novidade arredor de Cunqueiro e a súa obra. Outros dous libros aparecen nestas datas e a Galería Sargadelos de Barcelona acolle unha mostra de tres artistas, inspirada no escritor mindoniense.
A editorial NigraTrea publica dous volumes que recollen outras tantas facetas de Cunqueiro. El laberinto habitado recolle os seus artigos publicados na revista catalana Destino entre 1961 e 1976. Son case trescentos artigos nesta escolma que inclúe traballos nunca antes publicados en libro.
O Camiño de Santiago, Sherlock Holmes, cidades engaiolantes, a mitoloxía... están representados os intereses de Cunqueiro. De demonios y ángeles , por outra banda, é unha edición de bibliófilo, limitada a 125 exemplares, con once textos do escritor e outros tantos gravados de Javier del Río.
Un reto para os visitantes
Na Galería Sargadelos de Barcelona abriuse a mostra Onde está Álvaro Cunqueiro? , na que os artistas Rafael Castañer, Bayarri e Lolo, fascinados polo universo máxico de Cunqueiro, propoñen unha montaxe que reta aos visitantes a atopar a referencia ao autor e a súa fértil imaxinación.