Manuel Valcárcel e Sebastião Salgado centran dúas mostras de fotografía

A cámara do galego documenta a nómades nos cinco continentes, e a do mestre brasileiro, trinta anos de África


A Fundación Caixa Galicia ofrece en Santiago dúas exposicións de fotografía que achegan a grandeza e as penurias doutros pobos, doutras culturas e doutras formas de vida a través das imaxes dun artista galego que se abre camiño, Manuel Valcárcel (Monforte de Lemos, 1977), e doutro fotógrafo consagrado que consegue remover as conciencias coa crúa beleza das súas imaxes documentais como Sebastião Salgado.

A mostra Nómades. Fotografías de Manuel Valcárcel abriuse o luns na sala da Aula de Cultura e poderase visitar ata o 2 de decembro. Amosa en 53 fotografías en cor as vivencias ao longo dun ano de Valcárcel, cámara de televisión e reporteiro free lance, con cinco pobos nómades, un de cada continente, buscándoos sen guías e fuxindo dos itinerarios turísticos, cun fin: «Mostrar mediante a miña cámara de fotos esa liberdade pola que todos, no fondo, sentimos morriña». O material que seleccionou céntrase na maneira de vivir destes pobos errantes, pastores, pescadores e mercadores, ameazados pola extinción e que loitan por manter as súas tradicións vitais.

Manuel Valcárcel empezou en Asia, no Tíbet, onde captou imaxes de distintos lugares e grupos de mercadores no altiplano do Himalaia. Seguiu por África, en Alxeria, de onde amosa a vida dos tuaregs, o pobo nómade que está na orixe destas experiencias, porque soubo deles cando tiña uns doce anos, mirando un libro nos andeis da biblioteca paterna. De Europa elixiu, como non, Romanía e un colectivo de cíngaros, que foron os que máis tardou en atopar, porque xa quedan menos errantes por aquilo de que Romanía anda a censar a todo o mundo pola entrada na Comunidade Europea. En América foi Perú, onde estivo cos uros, que habitan en 40 illas flotantes no lago Titicaca. Foi neste país e no Tíbet onde o pasou peor polo mal da altura. E por último Oceanía, de onde colleu imaxes dos pinj, colleiteiros de corais nas illas Trobiand, en Papúa Nova Guinea. Caixa Galicia editou ademais un libro catálogo con 153 fotos e textos do propio autor contando a experiencia en cada caso, que presentou onte acompañado polo reporteiro de guerra Ramón Lobo.

A exposición dedicada á obra de Sebastião Salgado inaugurase a última hora desta tarde e titúlase África . Reúne máis de 50 fotografías en branco e negro, unha colección escollida que reflicten a ollada deste fotógrafo brasileiro, mestre do documental, sobre a vida no continente africano ao longo dos últimos trinta anos.

Esta mostra chega a Santiago no marco da programación do festival PHotoGalicia2007, polo que á apertura asiste o coordinador xeral do evento, Luis Posada, ademais do secretario xeral de Comunicación da Xunta e o director de Acción Social da Fundación Caixa Galicia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Manuel Valcárcel e Sebastião Salgado centran dúas mostras de fotografía