Prematuramente xubilada encontrou unha segunda vida modelando con pasta de papel todo tipo de figuras
09 oct 2020 . Actualizado a las 12:31 h.Ana Sastre Soriano naceu en Navas del Marqués o 9 de abril de 1951. Casada co galego Jose Luís Silva Prego nos anos setenta fixou a súa residencia en Galicia vencellada xa para sempre á área da Coruña. Mestra e diplomada en plástica e música, profesionalmente estivo ligada á docencia ata que as secuelas dun cancro a apartaron das aulas e dos nenos.
Prematuramente xubilada encontrou unha segunda vida modelando con pasta de papel todo tipo de figuras. A súa afección ao teatro levouna a desenvolver un importante traballo con monicreques e cabezudos. Logo chegaron os xoguetes para nenos. Máis adiante uniu dúas das súas grandes afeccións: o románico e o modelado en pasta de papel. Namorada das imaxes das virxes románicas comezou un traballo de recompilación primeiro e de reprodución despois de todas as imaxes de Nosas Señoras medievais. Imaxes como a Virxe de Carboeiro, a da Franqueira, a de Asadur, a do Cebreiro, a Virxe emparedada do convento das Bernardas de Pantón ou a perdida do mosteiro de Pesqueiras tiveron en Ana Sastre unha man amiga que lles devolveu vida.
O estudoso do románico Xosé Lois García ten dito da obra de Ana Sastre: «É unha mágoa que o conxunto de tallas que ela configurou non estean nunha fundación institucional ou formen parte dun museo de arte sacra».
En 2010 fixo a súa primeira exposición de virxes medievais en Arteixo. A acollida que tivo por parte do público coas súas coidadas imaxes levárona a percorrer salas de Ávila, Sada, Betanzos, na Casa-Museo de María Pita na Coruña ou na Ulloa.
Como persoa deixa un fondísimo recordo en cantos a coñeceron pois sen dúbida tratábase dunha persoa cun carácter tremendamente amable e próximo. Como artista no mundo do modelado en pasta de papel conseguiu pezas de extraordinario valor.
Sastre foi socia da asociación de románico O sorriso de Daniel e participou ata que a saúde llo permitiu das actividades desta asociación dedicada á divulgación do románico e á súa recuperación e posta en valor. Morreu en Sada o día da Virxe do Rosario do ano 2020.