A música, a tradición e o legado de Begoña Caamaño protagonizan a II Festa das Letras na Coruña

A Coruña prepárase para vivir unha das semanas máis intensas do seu calendario cultural coa celebración da segunda edición da Festa das Letras, unha iniciativa impulsada polo Concello para conmemorar o Día das Letras Galegas entre o 14 e o 17 de maio. A programación converterá a cidade nun gran escenario aberto dedicado á lingua, á creación artística e á memoria cultural, cunha homenaxe central á escritora viguesa Begoña Caamaño, figura á que se dedica este ano a efeméride.

Durante a presentación do programa de actividades, a alcaldesa, Inés Rey, destacou o carácter simbólico desta celebración, subliñando que «o Día das Letras Galegas non é só conmemorativo, senón unha oportunidade para reivindicar o valor da nosa lingua, da nosa cultura e a vitalidade da nosa creación cultural». Nese sentido, puxo en valor a escolla de Caamaño ao afirmar que a Real Academia Galega recoñece a «unha figura esencial da nosa literatura que contribuíu a enriquecer o noso patrimonio cultural e forma parte loxicamente da historia compartida do país», remarcando o compromiso da autora «coa lingua galega dende unha ollada feminista, coa cultura e coa capacidade da literatura para expresar quen somos». A rexedora tamén reivindicou o papel da cidade como espazo de referencia do galeguismo e da defensa da lingua, e que a Festa das Letras busca reforzar ese vínculo mediante unha programación que ocupará distintos espazos urbanos. Entre eles atópanse o Campo da Leña, a praza da Azcárraga, os xardíns de Méndez Núñez, o Teatro Rosalía, o Teatro Colón ou o centro Ágora, que acollerán actividades gratuítas e abertas a todos os públicos.

Programación 

A programación combina música, teatro, encontros e actividades familiares baixo un eixe común: «A lingua galega como ferramenta de creación, de transmisión e de encontro». O cartel musical aposta pola diversidade estilística, con propostas que van desde a tradición ata sons contemporáneos, con artistas como Ailá, M.J. Pérez, Fillas de Cassandra, Nove Louro, D'aquí Daría ou a Orquestra Bravú Xangai. Tamén haberá espazo para a reflexión cultural con encontros como o diálogo con Tanxugueiras no Teatro Colón, así como actividades dirixidas ao público infantil dentro do ciclo Ágora Son Primavera ou as andainas A Coruña das Letras, que propoñen percorridos pola cidade desde unha perspectiva cultural.

O tecido asociativo ten, ademais, un papel protagonista no peche da programación. Patricia Miño, presidenta da asociación cultural Xacarandaina, destacou que a Festa das Letras é unha oportunidade para celebrar a cultura de forma activa, subliñando a diversidade de estilos presentes na programación, desde a música tradicional ata propostas contemporáneas de carácter alternativo. Tamén puxo o acento no valor da participación cidadá e na importancia de espazos como a Foliada das Letras, que definiu como «unha das maiores representacións do noso saber popular», un encontro que invita a «compartir bailes e cantos con todos os que se queiran achegar».

A gran clausura da Festa das Letras terá lugar o domingo con esa foliada final nos xardíns de Méndez Núñez, onde se unirán agrupacións como Xacarandaina, Cántigas da Terra, Donaire ou Son d'Aquí, consolidando unha celebración que busca reforzar a identidade cultural galega desde a participación colectiva.

---

---

---