Xosé Pérez: «Temos que acadar un crecemento racional nas cidades para dar satisfacción ás persoas»

O experto explica a metodoloxía para darlle solución ao problema dos edificios baleiros na Coruña

a. a.
a coruña / la voz

O estudo, avaliación e proposta de posibles solucións da problemática dos edificios abandonados na Coruña é a materia de estudo no curso de verán que organiza a Universidade da Coruña, co apoio do Concello, con motivo da iniciativa de investigación Empty Coruña? Durante 11 días os alumnos asisten a clases impartidas por profesores e profesionais do urbanismo. Un destes profesores é Xosé Pérez Ríos, catedrático de Organización de Empresas da Universidad de Valladolid e orixinario de Monte Alto.

-Sobre que versa a clase que imparte neste curso de verán?

-O meu cometido é mostrarlles aos alumnos as ferramentas conceptuais e metodolóxicas que están relacionadas co enfoque sistémico, é dicir, global e integrador, algo imprescindible para tomar calquera tipo de decisión, neste caso a problemática urbanística na área coruñesa. Tratamos de saber como abordar a complexidade nun panorama no que están afectados os cidadáns, as Administracións públicas, as empresas e un longo etcétera, e poñer exemplos de aplicación real no urbanismo. Neste caso, se a área de influencia é moi ampla, como a da Coruña ou a rexión urbana A Coruña-Ferrol, as múltiples organizacións e Administracións necesariamente están interrelacionadas. Esa é a complexidade estrutural. Entón, as políticas de desenvolvemento urbanístico ou de transportes non se deben facer tan só a escala municipal. A única forma de facer un desenvolvemento urbanístico de boa calidade é integrando toda esa complexidade da zona xeográfica pertinente, que no caso da Coruña é toda a rexión urbana ata chegar a Ferrol cos seus 650.000 habitantes.

-Isto enfocado ao problema dos elementos baleiros que hai en toda a zona.

-Exacto. O problema de que haxa unha urbanización baleira en Miño non se debe de enfocar illadamente porque a causa de que exista non é local, senón que está a outra escala. Cando non se teñen en conta todos os factores a esa outra escala é cando se dá lugar ao que agora temos: múltiples pezas, barrios ou urbanizacións que están infrautilizadas ou baleiras. E dentro da cidade acontece o mesmo.

-É posible retomar o crecemento das cidades que había antes da crise?

-Fóra de España incluso hai cidades que son monstros e que crecen de forma case canceríxena, como a cidade de México. No caso de Galicia isto non se vai dar, nin falta que fai, pola cuestión do envellecemento poboacional. O que temos que facer é acadar un crecemento racional e controlado co que se vai a dar satisfacción ás persoas e aos axentes económicos.

-Cal podería ser unha posible solución?

-Unha proposta é a creación dunha especie de organización en forma de mancomunidade virtual, con funcionarios que xa existen, e que dediquen unha parte do seu tempo a tratar este tipo de problemas a esta escala. Pero é unha suxestión a moi longo prazo.

Conoce nuestra newsletter con toda la actualidad de A Coruña

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

Xosé Pérez: «Temos que acadar un crecemento racional nas cidades para dar satisfacción ás persoas»