O mellor de «Para mariñeiros, nós»

A cadea privada galega programa un especial da ficción de humor desde as 21.38 horas


redacción/la voz |

V Televisión ofrecerá esta noite, tralo informativo e a información do tempo, unha selección de case unha hora de duración con algunhas das mellores historias que xa se puideron ver en Para mariñeiros, nós , un programa que mostra a particular visión do mundo e do seu contorno más próximo de dous mariñeiros da Costa da Morte, na Coruña.

A serie grávase en Corme, nun dos bares máis coñecidos desta localidade. Nel desenvólvense moitas das tramas que teñen a Pinto (Suso Lista) e Cobiñas (Manuel Castro Duarte) coma protagonistas. A historia destes singulares mariñeiros xurdiu hai catro anos a través de Internet e desde o pasado mes de xuño chegan ós espectadores galegos grazas a V Televisión.

Neste espazo especial poderán verse algún dos episodios máis singulares destes dous mariñeiros cargados de retranca. Pezas de cinco minutos de duración cheas de realidade irónica. É o caso do Chosco , no que o capitán Cobiñas aposta con Manolo o Chosco a ver quen ve máis. O que non sabe Cobiñas é que o Chosco é o mellor xogador de Cormariñas, a localidade ficticia onde se desenvolve P ara mariñeiros, nós. Se alguén frecuenta o bar do pobo, ese é Cobiñas, aínda que chega un momento na vida dun home onde debe escoller se quere seguir o camiño da luz ou continuar polo camiño da escuridade. O mariñeiro decide reformarse, dar un xiro na súa vida e abandonar a bebida para acadar a felicidade.

Tamén os espectadores de V Televisión tiveron que afrontar o que parecía un dramático suceso. Nun dos capítulos que recolle este especial Pinto chega a taberna cunha noticia tráxica: seu socio, seu amigo, seu irmán, o capitán Cobiñas, morreu. Pero será certo o que di Pinto, ou outra das súas estratexias para ganar cartos sen traballar? Iso parece.

Pinto tamén coñece moi ben as historias do lugar, coma a que conta do mítico Tronzador, que fai honra o seu nome cada vez que colle un machado. Son só algúns exemplos do que hoxe recolle este especial dunha serie cargada de humor galego.

Conoce nuestra newsletter con toda la actualidad de A Coruña

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos

O mellor de «Para mariñeiros, nós»