«Non digo que fago parábolas porque a xente vai querer subirme aos tellados, pero esta viaxe é por un trasunto do mundo». O humor campea nas frases de Xabier P. Docampo para falar do libro que hoxe presenta na Coruña, O libro das viaxes imaxinarias, escrito por el, debuxado por Xosé Cobas e editado por Xerais.
Docampo e Cobas coinciden en que este é un libro «con dous autores» e cun proceso de traballo no que se foron retroalimentado as palabras e as imaxes.
Para Docampo, «as cidades e os reinos dos que se contan son imaxinarios, pero as cousas que suceden poderían ser reais porque eu describo o que hai no mundo». Asegura o escritor que «as paisaxes do libro estarán perfectamente claras na imaxinación do lector» e nese sentido pode dicirse que se despachou «a gusto». «O realismo faise literatura cando pasa pola imaxinación e eu conto coa imaxinación do lector», sentenza o escritor.
Para o autor de Cando petan na porta pola noite, este novo libro entende que os seus lectores «non van dicir que din un chimpo e cambiei de maneiras, pero hai algunhas diferenzas con obras anteriores, quizais está menos ligada aos xéneros tal como se entenden».
Para Xosé Cobas, o traballo dun debuxante é «mirar o que hai na trastenda do texto» e neste sentido cre que «hai que permanecer un pouco por detrás para poder facer unha interpretación gráfica do que o texto quere dicir desde as palabras». En calquera caso, asegura que «non debe ser redundante».