Javier Gestal: «O alcalde de Oleiros xamais me dixo o que eu tiña que facer en Carral»

Toni Silva CARRAL / LA VOZ

CARRAL

CESAR QUIAN

O rexedor queda en minoría tras a renuncia dos tres concelleiros do PSOE

05 abr 2022 . Actualizado a las 05:00 h.

O alcalde de Carral, Javier Gestal (Alternativa dos Veciños), coñeceu este domingo que comezaría a semana en minoría no consistorio. Pablo Couto avanzaba en La Voz de Galicia que onte, 4 de abril, presentarían a renuncia os tres edís socialistas. O divorcio non sorprende a ninguén. A última gota foi a denuncia que o propio Couto presentou ao alcalde por calumnias contra a súa persoa.

—Como está?

—Ben, como quere que estea?

—Igual hoxe é o día para preguntar.

—Esta dor xa hai tempo que a tiña.

—Pero non se sabía se ían pasar polo quirófano.

—Non te preocupes, estou ben, cando estás nunha situación tan mala coma esta non che sorprenden estas cousas.

—Antes das causas, falemos das consecuencias. Quedan en clara minoría con cinco concelleiros nunha corporación de 13. Incluso o alcalde de Oleiros acaba de tenderlle a man á nova portavoz do PSOE de Carral.

—Non vou entrar en ningún tipo de descualificación. A nosa política non é a propia de Vox, nin de Ayuso, nin trumpista, somos xente traballadora que quere sacar as cousas adiante pero sendo coherentes e sen poñer os carros antes que os bois. Que problema tiñamos nós antes? O mesmo que temos agora. Esta xente xa estaba hai moito tempo. Nós íamos aos plenos e eles tomaban as decisións que lles daba a gana.

—Nunha ruptura ninguén ten o 100 % de razón.

—Claro que non.

—Fan autocrítica desde a Alternativa dos Veciños?

—Non. Eu defendo a nosa postura. O que non podo permitirlle a ninguén é que veña e que faga o que lle dea a gana. O alcalde son eu, non o do PSOE.

—Toda a oposición coincide en que quen leva o bastón de mando na sombra é Susana Guimarey.

—Iso é mentira. Intentou [Pablo Couto] ser o alcalde e eu non llo permitín, e aí foi cando empezou esta guerra.

—Que proxectos quedan por aprobar no ano que resta de mandato?

—Nós comezamos por resolver a situación económica que nos atopamos, e reducimos a débeda, tanto financeira como cos provedores, que eran moitos. Pechamos por segundo ano consecutivo con remanente positivo, agora non hai facturas no caixón. E iso nos vai permitir afrontar o tema económico da pandemia e da guerra. Logo saen co do IDAE (unha subvención de 1,8 millóns para urbanizar o núcleo urbano), pero non nos daba o financiamento, tiñamos os informes en contra dos funcionarios, non foi un capricho por ir en contra do PP e do PSOE.

—Pero non me respondeu. Que queda por facer no ano que resta e como vai sumar apoios?

—As obras da Deputación teñen que ser aprobadas en pleno, pero se eles cren axeitado que o pobo de Carral non debe facer ningunha obra, que voten en contra. Outra prioridade é a depuradora do Quenllo. O saneamento non se ve, leva moitos anos sen funcionar, con sancións desde Augas de Galicia, e resulta que é máis importante arranxar a rúa xeral. Se a saúde pública non é importante para eles, que voten en contra.

—Rectificaría algo nestes tres anos na súa relación co xa ex socio de goberno?

—O que quero dicir é que abandonan o goberno no peor dos escenarios, con proxectos modificados por iniciativa do señor Couto e outros que están sen facer. Mira, tamén temos a Festa do Pan, para a que o señor Couto se comprometeu coa Deputación en conseguir 40.000 euros. E aínda vai a solicitude ao pleno este xoves e a feira é en maio.

—Carral é un goberno satélite de Ángel García Seoane?

—En ningún momento o señor alcalde do Concello de Oleiros se meteu en ningunha actuación nosa. Pero el é presidente de Alternativa dos Veciños, e eu teño que seguir as directrices que me mandan, pero xamais me dixo o que eu tiña que facer en Carral, ao contrario, téñolle que estar moi agradecido polo apoio que prestou ao noso Concello.

—Sorprendeulle coñecer a renuncia o domingo a través do periódico?

—Era Pablo Couto o que me dicía, «Échame». Pero eu lle respostaba: «Tranquilo, neniño, que eu non te vou botar».