«O cedé só serve xa para espantar paxaros»

O actor e humorista presenta esta noite no BâBâ Bar o seu novo monólogo, no que carga contra os vertixinosos avances tecnolóxicos


A Pedro Brandariz, como a moitísima xente, as novas tecnoloxías pasáronlle por encima como se fosen unha apisoadora. Pero como o cómico ten ese modo irresistible de contar as cousas, converte o drama nunha comedia. Ou nunha traxicomedia, mellor dito. Hoxe presenta no BâBâ Bar, ás 21.30 horas, o seu novo monólogo, titulado Technologies, que levará o venres ata o Edificio Social Toñito Espiñeira do Concello de Carral.

-Soa moi moderno iso de «Technologies». Pero ten a súa retranca.

-Analizo o que é o avance tan rápido que ten a tecnoloxía nestes tempos. É que a calquera persoa que lle guste un pouco o tema tecnolóxico se ve continuamente asoballada. ¿Qué facemos cos VHS e os deuvedés? Ou cos cedés mesmo. Menos mal que aquí en Galicia lle sacamos utilidade a todo, e aquilo que xa non serve o reciclamos para espantar paxaros. Que eu xa non sei como entra un paxaro en Galicia.

-¿De que formatos obsoletos fala?

-Comezo facendo un percorrido dende as cintas de casete ata os nosos días, ata a telefonía, que tamén ten o seu. Alí falo do WhatsApp e do pernicioso que pode chegar a ser. Sobre todo os grupos nos que te meten sen que ti o pidas e os emoticonos que non sabemos moi ben o que significan. Ou da xente que escribe unha palabra en cada liña. É terrible. Pasamos non sei cantos anos da nosa vida aprendendo a escribir SMS cos números, que para poñer un erre tiñas que premer tres veces ao sete. E agora é todo tan fácil que deberían de cobrar por palabra, porque hai algún que non ten medida.

-E todo con un ton crítico.

-Si que hai crítica, sobre todo ao tema da obsolescencia programada, que fai que pouco a pouco nos vaiamos quedando obsoletos. Todo o monólogo está feito dende o punto de vista hater, un pouco protestón.

-Vostede xa ten unha idade, pero hai moita xente que nunca viu unha casete.

-Por si hai xente moi nova no público e non saben o que son as cintas de casete, vou levar algúns exemplares para que o poidan ver fisicamente. Voulles ensinar como se rebobinaba unha cinta, como gravabamos nós mesmos por riba do que tiñan aquelas contas de 60 ou de 90...

-¿É dos que garda lixo na casa coa esperanza de que se revalorice?

-Os vinilos volveron, así que eu estou á espera de que volva o VHS, porque a cantidade de cartos que tiña eu invertidos en pelis orixinais non é broma. Ademais, eu nunca fun arriscado con formatos raros, nin vídeo Betamax, nin Láser Disc nin nada de iso. Eu sempre fun a formatos consolidados, pero que quedaron igualmente fóra. Pero si, teño tantas cintas VHS na casa que non sei se reciclalas como material de construción.

Conoce nuestra newsletter con toda la actualidad de A Coruña

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

«O cedé só serve xa para espantar paxaros»