Por primeira vez nas sete temporadas do ciclo coinciden dous autores nacidos en Bos Aires pero con obra en galego
13 jun 2016 . Actualizado a las 05:00 h.Mercedes Roffé e Eduardo Estévez participarán hoxe, ás 20.30 horas no auditorio do Ágora, no ciclo Poetas Di(n)versos. Este será o último recital desta temporada, a sétima. Como é habitual, a entrada é gratuíta e as intervencións teñen lugar baixo a condución da coordinadora do ciclo, Yolanda Castaño. Asegura a poeta coruñesa que esta iniciativa da concellería de Culturas «reúne mes a mes o mellor da poesía escrita en galego e en calquera outra lingua do mundo», e hoxe acollerá «aos primeiros autores arxentinos en sete anos de recitais». No acto «soarán versos orixinais en galego e en castelán, por vez primeira os dous poetas son nacidos no mesmo país». Bonaerenses os dous, Roffé e Estévez «escriben hoxe en día maiormente fóra de Latinoamérica: dende Nova York e o Val da Maía. Aínda que con frecuentes visitas á súa cidade natal, Mercedes Roffé dirixe hoxe dende a gran mazá un selo dedicado a publicar sobre todo poesía contemporánea de España e Latinoamérica, constituíndo ademais unha das voces máis recoñecidas da poesía latinoamericana actual», salienta Castaño.
Pola súa banda, Eduardo Estévez «instalouse en Galicia ata o punto de abrazar a nosa lingua coma o seu idioma de creación poética», explica a coordinadora. Tamén lembra que publicou unha ducia de títulos en galego que o fixeron unha das cabezas visibles da Xeración dos 90, formou parte do proxecto editorial Letras de Cal e os premios poéticos do Concello de Carral e o Eusebio Lorenzo Baleirón.