«Atrápame se podes» buscará en Betanzos concursantes para o seu bote de 25.000 euros

O exitoso programa de televisión Atrápame se podes fará este xoves, 16 de abril, en Betanzos a última parada da súa xira de castings presenciais por Galicia. A iniciativa chega despois das recentes probas realizadas en Ordes, Carballo e As Pontes, co obxectivo de atopar novos perfís que se atrevan a competir diante das cámaras.

A xornada de selección terá lugar na Praza do Campo, entre as 11.00 e as 14.30 horas, e está aberta a todas aquelas persoas maiores de idade que desexen participar, sen que sexa preciso contar con experiencia previa no ámbito televisivo. En caso de condicións meteorolóxicas adversas, o proceso trasladarase ao edificio Liceo.

Ademais da opción presencial, o programa mantén activas outras vías de inscrición para facilitar a participación: a través do correo electrónico atrapamesepodes@csag.gal ou enviando unha mensaxe de WhatsApp ao número 618 38 80 87.

Presentado polo comunicador ourensán Rodrigo Vázquez, o espazo da TVG emítese de luns a venres ás 15.40 horas e converteuse nun referente do entretemento na comunidade. O formato combina rapidez e coñecementos en ámbitos como a música, a gastronomía, a xeografía ou a actualidade nunha dinámica de cinco fases eliminatorias que manteñen en tensión aos concursantes ata o final.

Na actualidade, o bote do programa sitúase nos 25.000 euros, unha cifra que continúa aumentando en cada edición sen gañador. O reto para os novos aspirantes será igualar ou superar marcas históricas como a de Iván Pantín, quen acadou o maior premio rexistrado nun concurso televisivo galego, cun total de 101.800 euros.

---

---

---