Asegura que menos de 50 profesionais traballan e a cantidade e tamaño do producto son insuficientes
25 feb 2026 . Actualizado a las 16:56 h.O Bloque Nacionalista Galego (BNG) volveu premer o acelerador institucional para garantir o futuro do marisqueo na ría do Burgo. A deputada Iria Taibo vén de rexistrar novas iniciativas no Parlamento galego para esixir o cumprimento do acordo acadado o pasado 18 de febreiro na Comisión de Pesca, polo cal a Xunta debe asumir a recuperación da produtividade na zona e proceder á semente de marisco de xeito inmediato.
A situación do colectivo é crítica. Na actualidade, menos de 50 profesionais permanecen de alta nunha ría que sufriu un parón forzoso polas obras de dragaxe. Malia que os traballos remataron en abril de 2024, os mariscadores denuncian que non perciben axudas nin compensacións desde esa data. Aínda que retomaron a actividade a finais de 2025, a realidade a pé de area é desalentadora: a cantidade e o tamaño do produto son insuficientes para garantir a viabilidade económica das familias.
Erros técnicos e falta de especie autóctona
Desde o BNG sinalan directamente aos «numerosos erros técnicos» detectados durante a dragaxe executada polo Ministerio para a Transición Ecolóxica (Miteco). Segundo os nacionalistas, as cantidades sementadas inicialmente polo Estado non se corresponden co proxecto, sendo especialmente grave a escaseza de ameixa fina, a especie máis valorada e autóctona da ría.
«As dúas Administracións dedicaron máis esforzos a desfacerse da súa responsabilidade que a procurar unha solución», lamenta Taibo, quen lembra que, mentres o ministerio considera que o seu labor rematou coa obra, a Xunta ten a competencia exclusiva en marisqueo e non pode seguir de brazos cruzados. A semente debe realizarse nestes meses de inicio de primavera se se quere salvar a vital campaña de Nadal de 2026.
A denuncia nacionalista vai máis alá da produción e pon o foco na precariedade das instalacións. O colectivo carece dun punto de control definitivo, o que lles impide realizar o pesaxe do produto con normalidade, e seguen a agardar por vestiarios, aseos e un espazo de oficina que lles dea estabilidade.
Actualmente, os profesionais dependen dunha solución provisional mentres negocian un espazo definitivo que lles permita profesionalizar a actividade e atraer a novas xeracións de mariscadores. Para o BNG, sen semente inmediata e sen infraestruturas dignas, o futuro dunha ría que historicamente foi o motor económico da comarca quedará «seriamente comprometido».