«O hotel que se quere facer no Maxi recórdanos ao Algarrobico»

O voceiro do BNG en Oleiros, Manuel Sarmiento, aínda non ten claro cal foi a intención real do alcalde, Ángel García Seoane, cando hai dúas semanas resolveu delegar nel a negociación para a compra do solar do antigo hotel Maxi, en Santa Cruz, pero a súa vontade de asumir a función é tan decidida que onte mesmo presentou un novo escrito no que require que se suspenda calquera procedemento dirixido a autorizar a construción dun edificio no solar mentres Xunta e Concello non ditaminen se se axusta a lexislación patrimonial e urbanística.

-¿Por que agora?

-Sempre nos opuxemos porque xa vimos que se ía permitir un mamotreto enorme.

-¿Será máis fácil facelo como delegado para a operación?

-A delegación é unha oportunidade, xa que o alcalde non quixo dar pasos adiante para comprar a parcela, cando si os deu noutros momentos. Esta é unha forma de poñer en marcha este proceso. Como o alcalde se reserva o dereito final de comprar ou non, no seu momento terá que tomar a decisión e explicar claramente por que acepta ou rexeita o resultado do que estamos a facer.

-¿Ve posibilidades reais de que se realice, co elevadísimo prezo que, segundo o alcalde, ten?

-Aínda non temos a valoración que solicitamos, pero de todos os xeitos o Concello podería facerse coa parcela, como se deu noutras negociacións deste tipo, sen gastar un euro. Hai convenios urbanísticos que se teñen feito nos que o Concello se quedou con propiedades a cambio de aproveitamentos urbanísticos ou de cesións de fincas. É posible e ademais cremos que neste momento é unha oportunidade única.

-¿Por que?

-Porque o solar está baleiro. O edificio demoleuse por ruína. Estamos obrigados a levar adiante a nosa proposta para preservar un lugar emblemático que vai quedar para sempre.

-¿Por que neste caso o alcalde non quixo asumilo persoalmente?

-Non quero facer especulacións, pero desde o BNG esperamos que se dea conta de que é moi beneficioso e vai supoñer unha mellora non só paisaxística e de preservar unha xoia como o castelo, senón incluso de mellora no aspecto turístico.

-¿Se isto fose adiante sería un tanto importante para o BNG?

-Nós levamos feitas moitas propostas beneficiosas para Oleiros que non se tiveron en conta: hortas ecolóxicas, unha oficina de rehabilitación... Esta é unha máis. Esperamos que desta vez non se rexeite, porque comparando o antes e o agora da parcela a diferenza é evidente.

-Haberá quen pense que o beneficio económico de construír ese hotel tamén sería importante para Santa Cruz...

-Neste momento é dubidoso. Poñendo nunha balanza o atractivo que vai gañar Santa Cruz con ese espazo aberto con vistas ao castelo fronte a poñer aí un mamotreto enorme cando o hotel Portocobo está medio baleiro... Non penso que un hotel deste tipo dinamizase a economía. Aínda así, nós non nos opoñemos en ningún caso a un hotel de cinco estrelas. O que cuestionamos é que teña que ser nese sitio, machucando un lugar emblemático.

-En calquera sitio menos aí...

-Eu non quero comparar, pero isto pódenos recordar ao caso do Algarrobico: plantar no borde marítimo un hotel cun volume tremendo para que se poida ver o castelo ou o mar desde as habitacións ou a cafetería do hotel.

-¿Como explica o cambio na política urbanística de Alternativa?

-Terán que explicalo eles. Non sei por que ven este cambio, pero é moi certo que choca coa xestión urbanística que fixo ata agora. A razón non a sei.