Mariño di que usamos todo o cerebro porque senon as neuronas morren
22 mar 2013 . Actualizado a las 07:00 h.O neurocientífico Xurxo Mariño Alfonso (Lugo, 1969) é un dos grandes divulgadores científicos que hai en España. Impulsor dos cafés científicos e dos discurshow, este membro do grupo de Neurociencia e Control Motor (Neurocom) da Universidade de A Coruña atrévese agora cun libro, a súa terceira obra e a primeira publicada en castelán nunha editorial nacional, na que asume o reto de explicar de forma didáctica e sinxela, de ti a ti, o funcionamento da máquina máis perfecta que existe: o cerebro. Neurociencia para Julia, da editorial Laetoli, preséntase hoxe, as sete e media da tarde, na Domus de A Coruña.
-¿Quen é Julia?
-É calquera persoa interesada en saber como funciona a súa máquina, esa que temos nós aí dentro e que produce a mente. Son as persoas con curiosidade polo sistema nervioso.
-No seu libro derriba varios mitos, e un deles é o que di que só empregamos a décima parte do noso cerebro.
-Si. A verdade é que usamos todo o cerebro e todo o sistema nervioso. E ten que ser así, porque as neuronas que non empregamos morren.
-¿E é verdade tamén que ten unha plasticidade?
-Si. É algo extraordinario, pero é así. Pode incluso cambiarse a ruta pola que entra un sentido. Por exemplo, a unha persoa que perde o sentido do equilibrio pode ensinárselle a percibilo a través do tacto da lingua.
-E cal é a clave, ter moitas neuronas ou a comunicación, ou sinapsis, que existe entre elas?
-É certo que temos un número limitado de neuronas, 85.000 millóns, pero o que non é limitado é o número de ramificacións ou conexións entre elas. Si lle das máis traballo ao cerebro fanse máis conexións e aumentan as túas capacidades cognitivas.
-¿Entón hai que darlle traballo?
-Si lle das traballo ao sistema nervioso é probable que haxa, por exemplo, menos posibilidades de ter alzhéimer.
-¿Non é un pouco reducionista dicir que o eu, a mente consciente, é froito da actividade química e eléctrica das neuronas?
-Si pode parecer reducionista, pero non pode ser doutra maneira. Se unha persoa perde un cacho de cerebro, perde tamén as capacidades asociadas.
-¿Pero cómo se crea?
-A ciencia actual non ten a máis remota idea de como emerxe a mente consciente, o eu. Pero non hai ningunha dúbida de que é o resultado ou produto das células que temos no noso cranio.
neurocientífico e divulgador