Carballo / La Voz

«Recibín os seus ensaios, máis ultimamente estiven tan ocupado que non puiden lelos. Agardo atopar tempo para poder facelo pronto. [...] Estou encantado con este rexurdir da ciencia en España. Cos meus mellores desexos, permanezo á súa enteira disposición». Isto escribía o científico Charles Darwin en decembro do 1881 para respostar a unha misiva enviada polo naturalista ferrolán Víctor López Seoane, que lle solicitaba información sobre a embrioloxía dos vertebrados.

Esta correspondencia é precisamente unha das pezas máis destacadas da mostra que dende o sábado se exhibe nas Torres do Allo, que durante anos, e tras contraer matrimonio con Francisca Riobóo Álvarez, foi o seu domicilio e escenario das relevantes investigacións científicas. Xunto á copia da misiva: extensas coleccións de animais (foi un importante taxónomo), exemplares conservados en case perfecto estado e parte da súa documentación.

Aínda que formado en filosofía, en máis adiante en medicina, López Seoane tivo sempre un marcado espírito investigador e foi quen de atesourar, ao longo da súa vida, unha das maiores coleccións naturais que se recordan: máis de dez mil pezas, entre animais, minerais e fósiles. Tivo, no seu día, a maior biblioteca especializada da época (na actualidade no instituto Cornide) e formou parte de relevantes sociedades científicas europeas dedicadas ao estudo do medio natural. Varias publicacións súas puideron verse, asimesmo, en prestixiosas revistas internacionais.

E todo iso fíxoo mentres compartía vivenzas nas Torres do Allo, de aí a merecida homenaxe que dende o Concello lle queren render con esta mostra. Fano en colaboración con diferentes entidades, que cederon os materiais: Museo de Historia Natural e o Herbario SANT da USC, os Museos Científicos Coruñeses, o Instituto de Estudios Coruñeses José Cornide, o Museo do Pobo Galego e a Fundación Charles Darwin. «E dar as grazas, ademais, a Jorge Mira, pola súa colaboración para que isto sexa hoxe unha realidade», dicía onte o tenente de alcalde, Óscar Lema, durante a inauguración, e engadía que o desexo do Concello é «poñer as Torres do Allo no mapa». Referíronse tamén durante a intervención a un dos fitos máis relevantes da carreira do naturalista: a catalogación de varias especies, como o insecto Cebrio seoanei ou a víbora de Seoane (Vipera seoanei), «que de cando en vez se deixa ver aquí», bromeaba onte Lema. O edil de Cultura, Manuel García Velo, fixo referencia a que parte da investigación levada a cabo por Seoane foi posible, precisamente, polo seu emparentamento cos Riobóo.

Ao finalizar a introdución, Lucía Outeiral, unha das guías que compoñen o equipo que traballa habitualmente no pazo, dirixiu unha visita pola exposición.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Víctor López Seoane, o amigo galego de Darwin que viviu nas Torres do Allo