«Este ano temos actividades potentes»

O Concello de Zas contribúe coas actuacións de Rober Bodegas e De Vacas á programación das entidades de Baio


As entidades de comerciantes, sociais, culturais e deportivas de Baio idearon un amplo programa para este Nadal co fin de animar o ambiente no pobo e invitar ao consumo local. O Concello de Zas tamén contribúe con dúas actuacións, a de Rober Bodegas, prevista para hoxe, e De Vacas, para o sábado. O edil de Cultura, Manuel García, chama á participación.

-¿Tentan dar pulo comercial con actividades culturais?

-Nós, dende o Concello o que queremos é contribuír a incentivar o comercio local. Este ano creo que hai actividades potentes, como é a de mañá e a do sábado e logo tamén con talleres para facilitar a conciliación familiar.

-¿En que medida pode incidir a cultura na actividade económica dun pobo?

-Dende o noso punto de vista, no Concello pensamos que calquera actividade que consiga mobilizar a un bo número de persoas, sacar a xente das súas casas, darlle algo distinto ao habitual, ao final vai repercutir no movemento económico. Ou iso esperamos, tratar de mover a economía.

-Hai a percepción de que cando varias entidades se unen e un concello tamén se suma a unha determinada iniciativa os efectos multiplícanse.

-Estou de acordo. É evidente cando poñemos o fin colectivo como obxectivo. Un dos nosos propósitos para o ano que vén é poñernos de acordo asociacións e Concello para facer unha programación común. O caso de Baio é unha demostración. Saíu unha iniciativa das entidades e nós, como institución, o que fixemos foi implicarnos. E que menos.

-Daquela non é unha cuestión puntual.

-A nosa idea é que este sexa o camiño a seguir. Non só en Baio, senón a nivel municipio. Intentar que as asociacións funcionen dunha maneira máis sincronizada e nós canalizar o seu traballo. Para nós sería unha gran axuda. Que as entidades participen na programación do Concello. A nosa idea é profundar neste senso e con todos os colectivos, non só cuns poucos.

-¿Cales son os puntos fortes do programa cultural de Zas?

-Home, ata o de agora, o máis importante é a Semana Cultural de Zas. Logo están as actividades nos colexios, que son moi fortes e ás veces non transcenden tanto, pero son boas, e logo manter un bo nivel de actividade todo o ano, a través de iniciativas de tempo libre, obradoiros dependendo a estación e, sobre todo, tendendo á formación das persoas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

«Este ano temos actividades potentes»