A Casa da Cultura acollerá o domingo a estrea de «Saias do mar», a nova coprodución do Centro Coreográfico Galego xunto á compañía ArtistiKa Movemento
23 abr 2026 . Actualizado a las 00:10 h.Domingo 26 • 18.00 • Auditorio de Vimianzo • Entradas en woutick.es • O auditorio da Casa da Cultura de Vimianzo acollerá este domingo a estrea do espectáculo Saias do mar, a nova coprodución do Centro Coreográfico Galego xunto á compañía ArtistiKa Movemento. A peza, inspirada no Camiño da Traslatio, foi creada a modo de homenaxe á muller galega como forza ancestral ligada ao mar.
Onte presentouse o proxecto, precisamente na Casa da Cultura de Vimianzo, e a alcaldesa, Mónica Rodríguez, salientou a «satisfacción» do Concello por acoller tan interesante iniciativa, recalcando así mesmo o «compromiso» do goberno vimiancés coa cultura e, nomeadamente, coa danza.
Pola súa banda, o director da Axencia Galega de Industrias Culturais, Jacobo Sutil, fixo referencia ao «frutífero momento creativo» que está a vivir a danza galega e puxo en valor a convocatoria de coproducións que lanza periodicamente a Xunta e que permiten a entrada de novos nomes e estilos na creación coreográfica profesional.
Tamén interviñeron Nerea Andrés e Juan Miguel Hernández, codirectores de Artístika e integrantes do elenco desta peza xunto con Dayron Rodríguez, Irene Lorenzo, Laura Pereiras, Lucía Fontenla, Alba Fariña e Zoe Amor. Nerea agradeceu ao consistorio a confianza neste proxecto emerxente, mentres que Juan Miguel asegurou sentirse moi «arropado» en Galicia, así como moi inspirado polo mar e a muller galega.
As entradas para o pase do domingo xa están á venda en Woutick, e o luns habrá outra función para escolares.