A Deputación aportará 267.000 euros para o plan do Castelo de Vimianzo

Foi anunciado polo alcalde e o deputado Xesús Soto no simposio, que rematou onte


carballo / La Voz

O alcalde de Vimianzo, Manuel Antelo, e o deputado provincial de Patrimonio, Xesús Soto, aproveitaron onte a súa participación no simposio sobre o castelo para anunciar o novo convenio que rexerá a xestión do monumento no seu futuro. Este acordo incluirá a conversión do entorno da fortaleza soneirá nun gran parque urbano. O orzamento necesario para a intervención é de 300.000 euros, dos que 267.000 serán aportados pola Deputación. O ente provincial xa ten a cantidade reservada e será aprobada en datas próximas.

Antelo deu as grandes liñas da intervención, que consistirá en gran parte, dixo, no que xa está previsto nas normas urbanísticas: un amplo espazo axardinado, con entrada e saída dende o centro da vila, con muíño, lavadoiro e regato incluído. Os alpendres e unha vivenda abandonada do entorno, que xa forman parte da zona de influenza da fortaleza, pasarán a ser propiedade do Concello, ben por negociación, ben por expropiación, que xa está en curso. Estas construcións vellas serán destinadas a servizos propios dunha edificación histórica, como tendas, cafetería oficina de información e outros servizos que contribúan ó mantemento económico do conxunto.

Incluiranse áreas de ocio, haberá nova musealización, eliminaranse os espazos degradados, en fin, «cambiar Vimianzo» para que todos poidan velo e gozalo, anunciou o rexedor. O deputado dixo apoiar toda esta proposta porque o obxectivo da Deputación é que o castelo pase a mans do Concello. Apuntou, neste senso, que en Vimianzo e Zas, en relación ás Torres do Allo, así o entenden. «Estamos contentos de como evolucionaron as cousas estes anos». Xusto nesta mesa redonda, na que tamén participou o autor do Plan Director do Castelo de Vimianzo, César Abella, responsable de Trivium, xerouse un debate sobre a posibilidade de cobrar entrada. Os poñentes eran todos favorables, se ben coas excepcións de rigor. Se anualmente entran 30.000 persoas na fortaleza, cobrando o acceso poderíanse ingresar 30.000, 60.000 ou 150.000 euros segundo o prezo que se poña, veu a dicir o mandatario.

Un forte ballón de historia acompañado de arqueogastronomía

Foi unha xornada intensa, que comezou coa intervención de Carlos Galbán e Jorge Rouco para falar das relacións de poder e arqueoloxía. Continuou Xosé Ignacio Vilaseco Vázquez, que explicou a súa intervención en 1998, tralo derrube parcial dun tramo do muro exterior. Sacou como conclusión o especialista que a fortaleza que coñecemos actualmente é o froito das sucesivas reformas sufridas durante a historia, ben pola demolición provocada pola revolta irmandiña como polas intervencións posteriores.

A falsabraga, na que el escavou, non é medieval, segundo apuntou. Tamén foi sinalando as posibles reformas sufridas polo monumento ao longo dos séculos. Co derrube de finais dos anos 90, púxose de manifesto o recheo con materiais e pezas procedentes doutras estancias do inmoble. Considera que as reformas máis importantes puideron darse en torno ao ano 1604 por parte de Gil de Balensuela, alcalde e xestor da fortaleza. Cre que posiblemente destruise a vella torre medieval, cuxos alicerces se ven actualmente no patio de armas. A outra intervención importante sería entre 1880 e 1890 por parte de Evaristo Martelo.

Carlos Barros deu unha conferencia maxistral sobre os irmandiños, acto previo ao percorrido dende a casa de cultura ata o castelo, onde os participantes no simposio se mergullaron na arqueogastronomía coa degustación de costela en salsa de cervexa, sardiñas, troncos e antorchas, mexillóns e luras, sabores medievais entre grosos muros.

Os veciños xa pagaron a fortaleza

A mesa que xerou máis debate onte no simposio foi a protagonizada por Carlos Aymerich, Emilio Grandío Seoane e Bernardo Maiz Vázquez, que versou sobre a Historia do pasado recente do Castelo de Vimianzo: os sucesos do 36. Foi moderada por Luis Lamela, autor de varios libros sobre la represión tralo alzamento do 36. Defendeu Aymerich que a fortaleza dos Altamira foille expropiada a Dolores Martelo por unha corporación lexítima no ano 36. O Concello vimiancés pagou antes da guerra 9.000 pesetas polo monumento. Estes cartos foron consignados no Banco Pastor e, segundo a súa opinión, o inmoble histórico foi adquirido polo Concello e pagado polos seus veciños. Neste senso, apuntou, sería propiedade do Axuntamento.

Bernardo Maiz contou os acontecementos tralo golpe de Estado e como o Concello foi tomar posesión oficialmente das torres, pero desapareceron o libro de actas e demais documentación ao respecto. O goberno municipal daquel entón pretendía converter o castelo en consistorio, mercado, matadoiro e lavadoiro públicos. Maiz e Lamela tamén contaron a represión sufrida polos concelleiros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

A Deputación aportará 267.000 euros para o plan do Castelo de Vimianzo