Concha Blanco, María Canosa, Ángel Carracedo ou María Solar son algúns dos convidados deste mércores
01 sep 2021 . Actualizado a las 05:00 h.Chegou o día. Fóra das datas que serían habituais, consecuencia da pandemia, mais coa mesma forza e gana ca se fose en maio. Hoxe botan a andar no Couto, da man da Fundación Pondal, as Festiletras: 39 anos do que xa hai tempo que se vén definindo como un milagre ou, como dicía Xosé Neira Vilas, a meirande celebración das letras galegas do país. Ata o domingo, día 5, irán pasando por esta aldea de Ponteceso referentes galegos da literatura, da ciencia, da música ou do humor. Guadi Galego ou Carlos Blanco e Xosé Antonio Touriñán xa esgotaron as entradas (aquí, o programa). Os días 3, 4 e 5 serán quizais os máis intensos, mais non menos ilusionantes os de hoxe e mañá, pois están cargados de futuro e fortalecemento da raíz: os máis pequenos.
Nesta xornada de mércores comeza, por exemplo, unha das novidades do 2021, a iniciativa denominada Lendo a ciencia. Dirixida ao público máis novo, son propostas de lecturas en galego que levarán ata a aldea aos propios autores da obras, cun apoio científico. Unha mestura de letras e ciencias que chegará da man de nomes moi diversos e ben coñecidos. Ás 11.00, alí estará María Canosa con H2... Oh!, así como o xenetista xalleiro Ángel Carracedo, referencia internacional. Ás doce será a quenda de Concha Blanco, con Macedonia de versos; ás 16.00, de Juan Castro Rivadulla con A que cheiran as cores?, e ás 17.00, para María Solar con Os nenos da varíola.
Haberá que sumar, tamén hoxe, e a maiores do mencionado, varios espectáculos musicais, como O soño dos golfiños (12.30) ou a actuación da Banda das Apertas (14.00), coa presenza de Magín Blanco. Finalmente, ás 18.00, intervirán no Couto Mamá Cabra & Bellón e Maceiras con A música das buguinas. Todo isto, de balde, nutrindo de aprendizaxe e de diversión aos pequenos.
Durante todos os días do Festiletras traballará asemade o colectivo Mutante Creativo. Mou e Sokram deixarán a súa pegada nun mural baseado nas orixes musicais deste pequeno núcleo. Coa Fundación Eduardo Pondal colaboran Xunta de Galicia, Deputación, Concello de Ponteceso, Consello da Cultura Galega, Gadis, DeLeite, Bico de Xeado e Terras Gauda. Sobre todo, son vitais tamén os voluntarios, tanto os mozos como os sénior. Levan días preparando todos os escenarios, pois aquí todo ten un toque de feito na casa. Comezan cinco xornadas para vivir a cultura.
Encontros seguros e repartidos por toda a aldea
A pandemia deixou moitas herdanzas e unha delas é a aposta por escenarios alternativos. Eiras, cruces de camiños, rueiros variados... Toda a aldea do Couto será un festival de colorido e casetas artesás, a base de palets e madeira de serradoiros próximos. Parte dos asentos, pacas. Apóstase polo aire libre nun estrito protocolo hixiénico-sanitario xa posto en marcha o pasado 2020, co que denominaron Esencia Festiletras, un ano de transición. Xel ao entrar e ao saír, circuíto de acceso, público sempre sentado... Mudaron as formas, pero non a base, que non é outra que exaltar a creatividade do país e seguir alentándoa. O berce de Pondal continúa dando mostras dunha fertilidade afianzada.
