A segunda edición de Festiciencia reunirá escolares da comarca e de fóra dela
15 may 2019 . Actualizado a las 05:00 h.Se as Festiletras do Couto son xa de por sí un centro de peregrinación para estudantes da contorna, ese carácter divulgativo acadará hoxe a súa máxima expresión coa celebración da segunda edición de Festiciencia. Iniciativa da Fundación Eduardo Pondal, coa colaboración da Consellería de Educación, Universidade e Formación Profesional, así como da Deputación da Coruña, vén a ser unha feira científica -a primeira da Costa da Morte, nacida no 2018- que pretende reunir a estudantes da Costa da Morte, aqueles chegados de centros con Clube Científico.
Ciencia e convivencia son os dous eixes desta xornada que, á fin, ten como obxectivo o impulsar as vocacións e as curiosidades pola ciencia nesta comarca. Transcende máis alá, de feito, en tanto que hoxe achegaranse ata O Couto para Festiciencia escolares do colexio Eduardo Pondal (Ponteceso), instituto Eduardo Pondal (Ponteceso), instituto Urbano Lugrís (Malpica), instituto Fin do Camiño (Fisterra), CPI O Cruce (Cerceda), colexio Ponte dos Brozos (Arteixo) e instituto Agra de Raíces (Cee).
Un amplo equipo de voluntariado encargarse de estar pendente de cada detalle, tanto na carpa de exposición de propostas e experiencias como no tocante aos centros visitantes. Dende primeira hora da mañá ata iso das sete da tarde, cando está prevista a recollida de estands e o regreso ao punto de partida, sucederanse as actividades e tamén as sesións divulgativas, a primeira delas a cargo de David Ballesteros (11.00 horas), director das pioneiras Aulas Científico-Tecnolóxicas Isidro Parga Pondal. Haberá tempo, tamén, para a animación, de aí a intervención, ás 12.30 horas, de Paco Nogueiras e o seu Radio Bule-Bule.
Festiciencia inclúe unha serie de obradoiros polos que irán rotando os escolares, de xeito que todos os centros poidan coñecer, na súa quenda, os segredos da oceanografía, a cartografía, dos drons, dos xogos tradicionais ou do Areeiro Ar.
Así, logo da montaxe das experiencias, comezará ás 11.00 este peregrinar pola aprendizaxe. Haberá unha parada para o xantar e seguirá despois das 15.30. Un chocolate científico ben especial, compartido polo investigador Ángel Carracedo, marcará un alto na xornada, as seis. Festiciencia será a protagonista das Festiletras, se ben non hai que esquecer outras propostas distintas, como a poesía con Manuel Lourenzo, o achegamento á ornitoloxía con José Luís Rabuñal ou o sentimento musical con Rosa Cedrón e Emilio Rúa. Semella, pois, outra xornada especial, logo de momentos que tamén o foron como a intervención do contador Celso Fernández: levou unha morea de aplausos.
O programa para hoxe
Sede da Fundación. Festiciencia, pola mañá. Encontro de alumnado e docentes vencellados a clubs de ciencia. Sucesión de talleres e actuación de Paco Nogueiras (Radio Bule-Bule).
Carpa central. Café científico con Ángel Carracedo. O xenetista e investigador xalleiro volve visitar O Couto para compartir o seu saber cos rapaces: 18.00 horas.
Sede da Fundación. A partir das 20.00. Recital a cargo de Manuel Lourenzo, coa presenza do ornitólogo José Luis Rabuñal. Concerto de Rosa Cedrón e de Emilio Rúa.