Ponteceso, un dos 15 concellos na Asociación de Entidades Locais pola Lingua

Naceu esta nova asociación en Compostela e alí houbo representación das terras pondalianas


Carballo / La Voz

Ponteceso é un dos 15 concellos galegos que tomaron parte, en Compostela, na constitución da Asociación de Entidades Locais pola Lingua. A entidade nace co fin de promover proxectos conxuntos no ámbito da normalización lingüística, procurando unha xestión máis eficaz dos proxectos colaborativos en materia de lingua. Na xuntanza tomaron parte alcaldes e alcaldesas, concelleiros e concelleiras, así como persoal técnico. No caso de Ponteceso viaxaron ata Santiago o edil de Normalización Lingüística, Carlos Penedo, así como a técnica municipal, Julia Ures, dando así cumprimento ao acordo de adhesión a esta agrupación aprobado en pleno o 26 de novembro.

«Entre as vantaxes que ofrecerá a nova asociación destacan a mellora na xestión do traballo, a rendibilidade dos recursos públicos e o reforzo de todos os programas que se vaian desenvolver», apuntou o Concello pontecesán nas súas redes.

Os 15 concellos son Santiago, A Baña, Ames, A Coruña, Teo, Ribadeo, Ferrol, Narón, Ponteceso, O Grove, Rianxo, Pontevedra, Moaña, Vilagarcía e Rois. Estes municipios veñen xa participando en iniciativas como Apego (para o achegamento da lingua aos máis novos), o certame Youtubeir@s (xa está en marcha unha nova edición, por certo) ou o Club de Debate. Na asemblea mantida en Compostela, co alcalde Martiño Noriega como anfitrión, acordouse que a presidencia desta Asociación de Entidades Locais pola Lingua recaerá en Rianxo. A vicepresidencia asumiraa o Concello de O Grove, mentres que Pontevedra ocupará a secretaría e Ames, a tesourería. Ademais, Narón, Rois e Santiago ocuparán as tres vogalías da entidade que vén de xestarse.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Ponteceso, un dos 15 concellos na Asociación de Entidades Locais pola Lingua