O Couto acollerá en maio a primeira feira científica da Costa da Morte

Celebrarase durante dúas xornadas consecutivas, paralelamente ás Festiletras


Carballo / la Voz

O 17 de maio é un día para sentir as letras en Galicia. Esta data estivo sempre asociada ás artes, aínda que poucos son sabedores de que tamén é o Día de Internet en multitude de países do mundo. A Fundación Española para la Ciencia y la Tenología vén de garantir á Fundación Pondal a celebración dunha feira científica que terá lugar en Ponteceso paralelamente ás Festiletras. Dende a Fundación, fieis defensores de que non existe tal liña divisoria entre letras e tecnoloxía, chaman á participación non só de estudantes, senón tamén do público xeral. Así, a aldea do Couto converterase durante uns días na capital do coñecemento da Costa da Morte pois, mentres artistas como Ses, Txarango ou Feten Feten fan o seu no marco das Festiletras, ducias de rapaces amosarán ao mundo os seus proxectos do eido científico.

O 17, primeira xornada de feira e día internacional de Internet, estará dedicado a actividades de divulgación científica e tecnolóxica. Algúns dos espazos xa confirmados son a gravación do programa de radio Efervescencia, un referente na comunidade en materia científica; un workshop sobre ciencia cidadá; un xeocoaching tecnolóxico; unha xornada de observación de estrelas (sempre e cando o tempo o permita) ou unha xincana nocturna na que os participantes buscarán elementos da táboa periódica ocultos en diferentes puntos do pobo.

A seguinte xornada, a do día 18, terá xa o clásico formato ligado ás feiras das ciencias: unha gran carpa que acollerá proxectos do alumnado, que serán despois valorados tanto polo público como por un xurado profesional. A feira estará aberta mañá e tarde (en principio de 10.00 a 14.00 e de 15.30 a 18.30 horas), tanto a público escolar como familiar, para despois celebrarse a entrega de premios ás 19.00.

Arredor desta feira, e no horario de apertura da mesma, pivotarán diferentes obradoiros para os centros escolares que acudan á cita. Serán un taller científico sobre o mar organizado polo CSIC, experimentos científicos aparentemente máxicos, construción e programación de robots Lego Mindstorms e un obradoiro de investigación CSI. Tamén se prevén visitas guiadas á praia de Balarés para a realización dunha actividade ligada á súa historia industrial pola presenza de titanio nas súas areas. Un café científico e espectáculos que ofrecen unha aproximación á música dende unha perspectiva interdisciplinar completan o programa inicial previsto para ese segundo día de feira.

Á hora de poñer en funcionamento o proxecto Festiciencia, unha idea que vén desenvolvéndose dende varios meses atrás, a Fundación Española para la Ciencia y la Tecnología vén de conceder á Fundación Pondal, coordinadora e responsable última da iniciativa, unha axuda de 15.000 euros que se dividen entre gastos de persoal (2.000) e gastos de execución (13.000). «É a primeira vez que se nos concede algo así», expresaba onte Xosé María Varela, xerente da Fundación e responsable do proxecto, que se amosaba ademais ilusionado por poder poñer en marcha unha cita que pretende rachar con esa liña divisoria inexistente entre as ciencias e as letras. «Ao final todo é coñecemento», engadía.

Colaboran, ademais dos municipios limítrofes, o CSIC, a Deputación da Coruña e a empresa Ceo Aberto, que actuará como asesora científica da iniciativa. Ademais, indicaba onte Varela, tamén se prevé a celebración dun obradoiro sobre a vida e obra do científico cormelán José María Mosqueira Manso, precisamente no 50 aniversario do seu pasamento. Será o día 18 e estará conducido pola compañía teatral Os Quinquilláns, veteranos xa neste tipo de citas educativas.

Primeira aproximación ao programa

Día 17

Programa Efervescencia. A Fundación Pondal acollerá a gravación deste espazo, decano da divulgación científica en España.

Ciencia cidadá. José Viñas amosará como crear unha aplicación de ciencia cidadá e as súas posibilidades como ferramenta educativa.

Historia da ciencia. Espectáculo en formato charla no que David Ballesteros falará dos inventos e descubrimentos que melloraron a calidade de vida da poboación.

Xeocoaching. Actividade similar a unha busca do tesouro na que os participantes poñerán a proba os seus coñecementos.

Yayotech. Voluntarios ofrecerán nocións a quen o desexe sobre o manexo dos teléfonos móbiles.

A morte ca ciencia! Atrevidas actividades nocturnas pola zona.

Láser graffiti. Con música e proxeccións visitarán os concellos implicados no proxecto e levarán a cabo graffitis dixitais sobre fachadas de edificios.

Observación de estrelas. Só se o tempo o permite.

Ciencia para insomnes. Os participantes buscarán elementos da táboa periódica polo pobo nunha xincana nocturna.

Día 18

Feira. Quen así o desexe poderá visitar os proxectos dos alumnos participantes na carpa da feira, que estará aberta o día 18 mañá e tarde (10 a 14 e 15.30 a 18.30 horas). Ademais, o público poderá votar polo seu experimento preferido a través da aplicación Epicollect5. Premios ás 19 horas.

Obradoiros paralelos. Os rapaces participarán, ademais, en talleres ao longo da mañá.

Visita a Balarés. Actividade ligada á historia industrial da zona.

Café científico. Charla informal cun científico de renome.

Espectáculos científico-artísticos. Aproximación á música dende unha perspectiva interdisciplinar. 

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

O Couto acollerá en maio a primeira feira científica da Costa da Morte