Carballo / La Voz

Se a forza da humildade e do compromiso movese o mundo, dende O Couto, en Ponteceso, podería botarse a andar. A Fundación Eduardo Pondal entregou onte os Premios Bos e Xenerosos 2015, uns galardóns que, dalgún xeito, exaltaron esas calidades e que recolleron Ángel Carracedo, Margarita Ledo, Siro López e Guadi Galego (esta última, a través de Eloi). Estiveron acompañados por amigos e familia, mais tamén por unha ampla representación: a directora xeral de Relacións Institucionais e Parlamentarias, Blanca García-Señoráns; o secretario xeral de Política Lingüística, Valentín García; o presidente da Real Academia Galega, Xesús Alonso Montero e o escritor Neira Vilas, entre outros.

Carracedo, catedrático de Medicina Legal e recoñecido científico, investigador e divulgador, dixo sentir «unha honra grandísima», por este premio que «é coma estar na casa». «Ultimamente estou moi bergantiñán», bromeou, para dicir que ficaba rodeado dos seus familiares. Dedicoulles o galardón: «Deles aprendín todo: o amor á terra, a importancia do traballo, da humildade, aprendín a intentar ser bo e xeneroso porque todos e cada un deles o son». Na súa liña de sinxeleza, afirmou que agora que xa é bo -oficialmente- terá que mudar de propósito de ano novo. E xa o ten decidido: viaxar menos e pasar máis tempo cos seus. Fixo unha chamada a unha política de «mans abertas», tamén na ciencia, eido certamente competitivo. Para iso lembrou unha frase da súa avoa: «O que abre os brazos, recibe abrazos». Apelou á xenerosidade: aos fillos e ao seu equipo transmítelle que, así, a el, non lle foi tan mal.

A catedrática, escritora, xornalista e cineasta Margarita Ledo quixo coller algún risco dos seus compañeiros galardoados para intervir e asegurou que iso de ser «bo e xeneroso» é un «anceio moi difícil de definir». Ledo fixo fincapé ao longo do seu discurso na palabra emancipación e contou como, estando unhas horas antes en Bilbao, se veu abraiada por unha exposición de Jean Michel Basquiat no Guggenheim. A mostra dese artista hip-hop, dese rapaz negro do Bronx que morreu aos 27 anos e que segue sendo referencia no mundo da arte contemporánea, xiraba en torno a unha idea: «Now is the time». Preguntouse Margarita se tería pasado a día de hoxe o tempo de emancipación que soñaba o bardo. ¿Que mudou? Os tempos. Rematou aludindo ao espertar do sono dos galegos. «Unha pequena nación, unha nación subalterna como Galicia, tamén pode contribuír á transformación da humanidade», dixera antes.

O artista, debuxante, humorista gráfico e xornalista Siro López, fixo gala da súa marca e dixo que, ao igual ca Margarida, ten recibido xa un galardón con este nome de «bo e xeneroso»: «Se non me coñecese, empezaría a crer que é verdade». Falou, entre outras cousas, daqueles anos sesenta, setenta e oitenta que homes e mulleres coma el vivían con moita esperanza. Ata tiñan un lema: «Nós temos fe no noso pobo e, moi logo, o noso pobo terá fe en nós». Quizais, recoñeceu, hoxe xa non sexa tan optimista, pero a pesar diso segue traballando pola cultura e intentando facer xornalismo «con absoluta liberdade de conciencia». Hai algo no que no cambiou en absoluto: «O amor pola miña fala. Nunca quixen deixar Galicia para non deixar de escoitar o meu idioma». Por todo iso onte todos eles foron chamados Bos e Xenerosos.

Música, poesía e intervencións

O acto de entrega dos Premios Bos e Xenerosos 2015 comezou onte coas voces de varios pequenos e coa de Silvia Losada, guitarra en man, interpretando o poema pondaliano Ponteceso, ao que a artista lle puxo música. Interveu logo, xusto antes da chamada aos premiados, o presidente da Fundación Eduardo Pondal, Lois García Carballido. Aludindo a varios autores, definiu o que é ser bo e xeneroso e, niso, explicou por que son exemplo os catro galardoados de onte, «os mellores nos seus campos». Rematou asegurando: «O 7 de marzo de 2017 fará cen anos que Manuel Lugrís despedía ao bardo de Ponteceso, ao autor do himno de Galicia, con estas verbas: ?Un bardo que tan ben canta non pode temer o olvido?. A intensa atención ás demandas desta Fundación e a xenerosa atención das autoridades locais, provinciais, autonómicas, e agardo que tamén do Estado, son o mellor testemuño de que en Ponteceso recollemos esas verbas do que fora presidente da RAG para que nunca se esqueza a contribución de Pondal ó orgullo de sermos galegos e galegas».

Pechou a quenda de intervencións a directora xeral de Relacións Institucionais e Parlamentarias, Blanca García Señoráns. Felicitou á fundación pontecesá pola súa grande actividade e boa colaboración coa Xunta dende os seus inicios. A García Carballido, novo presidente, pediulle que collese a testemuña do anterior -José Luis Fondo Aguiar- e que manteña vivo o espírito e a identidade da aldea do Couto, algo que se transmite moito máis alá de Ponteceso. Dirixiulle tamén unhas agarimosas palabras de parabéns aos galardoados cos Bos e Xenerosos.

Finalmente, volveron intervir os máis novos, pero desta volta coa interpretación do Himno Galego, acompañados ao saxofón pola mestra Blanca. Eles son o futuro da lingua e o futuro do pobo galego.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Os Premios Bos e Xenerosos eloxian a forza da humildade e do compromiso