«Dános moita satisfacción ver á xente tan contenta»

A vila da Barca agarda xuntar hoxe na vixésima Festa do Congro a máis dun milleiro de comensais


Carballo / La Voz

Non só de fervor vive a Semana Santa da Costa da Morte. En Muxía, desde hai xa dous decenios, o congro é o rei do Venres Santo coa celebración dunha festa gastronómica que nos últimos anos reuniu a arredor dun milleiro de comensais. Hoxe, a partir da unha da tarde, o paseo marítimo volverase converter nun gran comedor onde degustar o congro en cinco preparacións diferentes, tal como explicou a tenente de alcalde da localidade, Purificación Lema Pose, nos micrófonos de Radio Voz Bergantiños.

-Vinte anos xa.

-Si, e esperemos que continúe moitos anos máis porque cada vez é maior, hai máis xente e máis entusiasmo por facela. Haberá degustación de congro en cinco preparacións distintas a partir da unha do mediodía no paseo marítimo: empanada de congro de millo e de trigo, congro en salpicón, ao forno e a prancha, ademais de pan e viño, así que a xente irá ben servida.

-E hai que ser puntuais porque normalmente voa.

-Así é, claro que voa. Esperamos que este ano tamén haxa moita xente, como nos últimos anos. De feito, o pasado quedámonos un pouco escasos, pero desta vez mercamos máis congro e haberá para todos e para que todo o mundo saia satisfeito de Muxía.

-¿Cantos quilos de congro prepararán este ano?

-Arredor de 900 ou 920 quilos, pero hai que ter en conta que o congro ten un desperdicio. Calculamos racións para unhas 1.200 persoas, que é moita xente, pero tamén é unha satisfacción moi grande ver nestas datas Muxía tan concorrido e a xente con alegría. Aquilo é unha festa moi grande e a nós danos moita satisfacción ver á xente tan contenta.

-¿Quen se encarga de preparar a festa?

-Hai un grupo de persoas contratadas polo concello que xa están desde o mércores limpando e adobando o congro e que se encargarán tamén de elaboralo. As empanadas serán preparadas en varias panaderías diferentes, porque son moitas as que se fan e Protección Civil organizará o tráfico e axudará e colaborará en todo.

-¿Como foi a evolución da celebración nestes anos?

-Pois cada vez con máis xente e tratando de que o congro sexa mellor. Cando se comeza non se sabe exactamente como é, pero ao levar xa uns anos foise evolucionando e sabendo cales son as mellores preparacións, canto tempo hai que adobalo... A maioría da xente repite de anos anteriores e xa son mestras do oficio.

-E o congro non é a única proposta de Muxía para estes días.

-Si, temos mostra de artesanía local, tanto en palillo como en pintura, e todo elaborado por xente que vive aquí no Concello. A Mostra do Encaixe de Camariñas é a que ten máis fama, pero en Muxía temos un encaixe marabilloso e xente que fai verdadeiras obras de arte, así que animamos aos visitantes a que pasen visiten a nosa mostra de artesanía e palillo e vaian despois á degustación do congro, ou viceversa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Dános moita satisfacción ver á xente tan contenta»