«No polígono, en vez de medrar as empresas, medran plantas invasoras»

Natural de Cerqueda, o candidato do BNG en Malpica, Daniel García, cre que o estado do polígono malpicán é un «fiel reflexo» dunha mala xestión política e económica


Carballo / La Voz

Daniel García foi presentado o mércores como o candidato á alcaldía de Malpica polo Bloque Nacionalista Galego, un partido ao que leva vinculado dende os 17 anos. Natural de Cerqueda, agora suma 35 anos de idade e traballa como cociñeiro nunha escola infantil de Ribadeo (Lugo).

-Dobre responsabilidade: liderar unha candidatura e recoller a testemuña do finado Paco Souto.

-Non é que me impoña, porque coñecer a causa tamén axuda moito [ri]. Pero tamén é certo que se recolle nun momento delicado, no que fará case dous anos do falecemento de Paco, con todo o que iso supuxo para o BNG.

-Foi difícil de convencer para lanzarse a este novo reto, ou enseguida se lanzou?

-Estas cousas sempre hai que pensalas [ri], porque supón cambios importantes, pero é un proxecto que me ilusiona moito.

-Cre que a xente ten ganas dun cambio político en Malpica?

-Creo que queren caras novas e ilusión. Por aí debemos empezar.

-Considera que está desgastado o goberno local actual?

-A miña percepción é que falta un proxecto político definido para Malpica: creo que calquera persoa do concello o pode ver. A política municipal non poden ser só catro obras circunstanciais ou distribuír tales ou cales partidas do orzamento. Precísase dun plan integral e que chegue a todas as parroquias, sen discriminacións.

-En que liñas quere traballar?

-O primeiro é combater a decadencia na que está sumida Malpica, froito destes anos de políticas erráticas. Despois, habería que tocar un pouquiño todos os ámbitos: accións urbanísticas, culturais, deportivas, empresariais... Que todas elas contribúan a revitalizar o Concello.

-A que se refire cando fala de decadencia?

-O feito de non ser capaz de estar á altura doutras grandes localidades [equiparables a Malpica]. Vímolo na presentación dos candidatos de Bergantiños, hai uns días: en Carballo, cunha alcaldía do BNG, logrouse un modelo de transición e evolución. Hai que lograr exportar ese modelo ao resto de municipios da comarca, evidentemente adaptando e axustando as políticas a cada concello diferente.

-Que sectores cre que se viron máis afectados nos últimos anos?

-No porto tivo que suceder unha traxedia para que saísen á luz os problemas que hai na dársena. O porto ten que estar ao servizo dos mariñeiros, non ser un perigo para eles. Un reflexo dunha mala xestión é o estado do polígono industrial: en vez de medrar empresas, alí medran plantas invasoras. Así non hai maneira de fixar poboación, nin de crear empregos.

-E no referido á carencia en determinados servizos, como no apartado sanitario?

-Pois iso é algo que non é competencia local, pero se eu fose alcalde e na Xunta gobernase o BNG, tería loitado porque non se fixeran recortes tan abusivos na miña vila. Non hai desculpa posible. Eu tamén son traballador da Administración e sufro estes recortes na miña propia pel. Creo que se están facendo indiscriminadamente onde máis lle doe á xente, e vese que para outras cousas hai cartos dabondo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos
Comentarios

«No polígono, en vez de medrar as empresas, medran plantas invasoras»