«Gusto moito do galego, sempre me fascinou escribir e falar neste idioma»

A poeta cacereña afincada en Malpica presentará este sábado «Poemas a flor de pel»


Carmen Muñoz Fernández (Cáceres, 1969) volve a dar renda solta á súa vea poética nas páxinas dun novo libro, Poemas a flor de pel, unha obra bilingüe en galego e portugués. O centro cívico de Malpica, localidade na que a autora se instalou hai xa uns cantos anos, acollerá o sábado (19.30 horas) a segunda posta de longo do libro, tras o acto celebrado en decembro en Viana do Castelo. A obra leva á súa portada unha imaxe do fotógrafo luso Pereira Lopes, con quen Carmen Muñoz xa traballara no libro 20 poemas en remanso e nunha exposición conxunta e que participará no acto do sábado inaugurando a súa propia mostra: Do meu Porto de vista...

-Parece que os seus versos casan ben coas imaxes de Pereira Lopes.

-Nesta ocasión simplemente lle pedín unha fotografía para a portada, pero como eu ía presentar o libro decidiu aproveitar para facer unha exposición porque gústalle moito Galicia e busca calquera escusa para vir; é un namorado desta terra... A exposición chámase Do meu Porto de vista... e recolle imaxes daquela cidade, así que non ten nada que ver cos meus poemas.

-¿Onde atopa a súa fonte de inspiración?

-Falo de distintas vertentes do amor: o amor a Galicia, o amor dunha nai, o amor á poesía e aos poetas... E tamén inclúo a fe que teño en Deus polo Camiño que fixen a Santiago. Estes poemas están escritos entre os anos 2013 e 2015 e fun reunindo aqueles cos que máis sentín a flor de pel, de aí o nome do libro.

-¿Despois de tantos anos aquí xa se considera máis malpicá que cacereña?

-Considérome metade e metade, porque teño 46 anos e levo aquí 23 así que... Gusto moito do galego, sempre me fascinou escribir e falar neste idioma e xa teño 3 fillos que son de aquí, así que eu xa estou plenamente arraigada aquí. Tamén me inflúe moito o contacto co mar. E tamén me gusta moito a ligazón de Galicia con Portugal, por iso o libro é bilingüe.

-¿Son bos ou malos tempos para a poesía?

-A min iso é algo que non me inflúe moito, porque a miña poesía é máis sobre o meu estado de ánimo, da miña alma, de momentos e experiencias máis que do que pasa no mundo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Tags
Comentarios

«Gusto moito do galego, sempre me fascinou escribir e falar neste idioma»