Enfróntanse este domingo no Municipal de Vimianzo despois de dúas xornadas inaugurais nada boas para ningún dos dous conxuntos. Os técnicos, Pedro Gómez e Ángel López, analizan o encontro e as potencialidades do rival
14 sep 2018 . Actualizado a las 05:00 h.«Non podemos deixar pasar ocasións como a que tivemos co Lalín»
Terceira xornada ligueira e primeiro derbi de Primeira Autonómica co enfrontamento, o próximo domingo, do Soneira e o Fisterra. Ocupan os vimianceses o décimo posto na clasificación, cunha vitoria na xornada inicial e unha derrota a pasada fin de semana. O adestrador, Pedro Gómez, analiza o choque ante o Fisterra.
-Complicáronse as cousas ante o Lalín o pasado domingo.
-Pois acabamos de comezar a tempada, viñamos dunha vitoria na casa e na última xornada quizais non estivemos todo o finos que nos gustaría. Na primeira parte tivemos varias ocasións de gol, e non obstante eles adiantáronse na primeira que tiveron antes de chegar ao descanso. Iso fíxonos bastante dano e, xa na segunda parte, non soubemos responder para remontar o partido.
-Hai que ir sumando puntos...
-O que está claro é que temos que saír a competir cada partido coma se fose o último, pese a estar aínda na terceira xornada. Non podemos deixar pasar ocasións coma as do outro día: un partido que era gañable e que dominamos durante todo o encontro. O equipo non pode desanimarse despois de recibir gol. Tamén foi un día de calor, e notouse no aspecto físico, pois a segunda parte fíxosenos longa.
-Como chegan de saúde?
-No último encontro ante o Lalín tiñamos seis ou sete baixas. Para este domingo recuperamos a Aaron, Josiño, Sito... Chegamos só coa baixa de Chapela, que non puido aínda comezar a tempada. Practicamente dispoñemos de todo o cadro para este partido e esperamos a partir de agora coller nivel nos adestramentos.
-Que agardan do Fisterra?
-É un equipo co que xa nos enfrontamos na Copa Deputación, moi potente e con pouco que ver co que era o ano pasado. Volveron varios xogadores que estiveron competindo no Dumbría e que lle van dar un plus ao grupo. Teñen moito potencial. En xeral creo que todos os equipos costeiros de Primeira este ano miraremos máis cara a parte alta da táboa e non pasaremos as penurias sufridas a tempada pasada.
«Tivemos un inicio de competición duro, con equipos moi fortes»
Se o Soneira se mantén na liña das últimas tempadas, o Fisterra vén de sufrir unha fonda renovación non só na bancada, senón tamén no equipo técnico. Un empate e unha derrota deixan ao club no décimo terceiro posto da clasificación, aínda que Ángel López, que toma de novo as rendas do equipo, cre que é cuestión de «ir collendo ritmo».
-Preparándose xa de cara á fin de semana?
-Si, aínda que o número de xogadores adestrando é algo máis reducido, pois moitos rapaces foron estudar para A Coruña.
-Tiveron un pequeno traspés nestas dúas primeiras xornadas.
-O certo é que temos un calendario duro para estes primeiros partidos, cos equipos tecnicamente máis fortes da categoría. E agora espéranos un derbi, que teñen sempre moita intensidade.
-Como valora o Soneira?
-É un club que leva dous ou tres anos moi ben estruturado e que mantén sempre o seu estilo de xogo. Patinou co Lalín, que é un equipo potente, pero os comezos de liga son sempre complicados e calquera partido pode complicarse con lesións, sancións, goles inesperados, decisións arbitrais.... Hai que ir rodando ata coller velocidade de cruceiro.
-Moitas baixas?
-Teremos a do capitán, xa que levou dúas tarxetas amarelas o outro día e ten un partido de sanción. Polo demais, temos a dous xogadores que comezaron a adestrar a semana pasada, como foron Breixo e Coté. Lesións, en principio, chegamos sen ningunha.
-Importante renovación a que sufriu o Fisterra de cara á presente tempada. Moitas caras novas.
-O certo é que si: sete ou oito xogadores novos, adestrador novo e tamén estamos tentando buscar nova forma de xogar.
-Non é a súa primeira vez aos mandos do club...
-Ao Fisterra adestreino por última vez haberá dez anos. Son da vila e xoguei sempre aquí. Nisto de ser adestrador tamén hai que descansar de cando en vez!
-Como volver á casa por Nadal.
-Exactamente! [ri] Agora temos que ir collendo o ritmo.