Alejandro Finisterre: once anos de silencio


Onte cumpríronse 11 anos do pasamento en Zamora de Alejandro Finisterre (Fisterra, 1919- Zamora, 2007), o poeta, o editor, o inventor, o intelectual, o amigo. Lembro a chamada do xornalista Santiago Garrido comunicándome o fatal desenlace. Aqueles días andabamos un grupo de amigos ultimando co autor de Cantos rodados a súa inminente visita á nosa vila para participar nas xornadas de homenaxe a Cipriano Fernández, alcalde republicano do municipio vilmente asasinado polos fascistas en 1936. Alejandro estaba tremendamente ilusionado coa posibilidade de poder regresar á súa terra natal e saldar aquela amarga experiencia vivida por mor da fallida declaración coma fillo predilecto da localidade. No seu ánimo non se albiscaba o menor atisbo de rancor nin xenreira, só ilusión e gratitude pola nosa iniciativa. Aqueles días falei con el ducias de veces para mantelo informado de todo. Nesta ocasión, tiñamos todo atado e ben atado. Contabamos coa colaboración absoluta do concello, co acordo unánime de todos os grupos para, desta vez si, nomealo fillo predilecto de Fisterra, aproveitando a celebración das xornadas. Tiñamos a confirmación nos actos de grandes figuras da cultura galega, coma o daquela presidente da RAG, Xesús Alonso Montero, ou escritores de prestixio coma Marilar Aleixandre, Xosé Luís Axeitos, Luís Lamela, Miro Villar ou Xesús Rábade, entre outros. Lamentablemente, a pérfida morte adiantóusenos e todas as ilusións e os nosos esforzos marcharon con Alejandro na barca de Caronte camiño do alén. El, o fisterrán máis universal de todos os tempos, o editor máis influínte do século XX en Latinoamérica, o inventor do futbolín, o defensor a ultranza da causa lexítima da República, o intelectual exiliado e perseguido por medio mundo, o poeta, o fillo do radiotelegrafista da estación do Marconi, o home que decidiu levar consigo durante toda a súa vida, e sempre con orgullo, o nome do seu pobo natal; hoxe, once anos despois de nos deixar, continúa morando no máis absoluto silencio. Maldita desmemoria! Mágoa de clase política!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Alejandro Finisterre: once anos de silencio