«O obxectivo é facer que os ciclistas se sintan como no Tour de Francia»

MELISSA R. / VERÓNICA C. CARBALLO / LA VOZ

DUMBRÍA

JOSE MANUEL FERREIRO

«Hai que destacar o impacto económico que supón para a comarca. A ocupación hostaleira está cuberta», dijo César Ferrío

06 jul 2018 . Actualizado a las 05:00 h.

Xa non queda nada para que se celebre a cuarta edición da marcha cicloturista máis prestixiosa de Galicia, o Gran Fondo Ézaro, que este ano, ademais, forma parte do circuíto das series mundiais da Unión Ciclista Internacional (UCI). Este último aspecto tivo moita repercusión na cita deportiva, e Dumbría, ademais dos outros cinco concellos polos que transcorre a ruta (Cee, Muxía, Carnota, Muros e Mazaricos), xa ten case todo listo. O técnico de Deportes, César Ferrío, contou todo tipo de detalles para os micrófonos de Radio Voz Bergantiños.

-Récord de inscritos para este domingo pola mañá. ¡O Gran Fondo é un sen fondo!

-A verdade é que si. Cumpríronse as expectativas e estamos moi contentos. O feito de ser a única proba da UCI no calendario de España tamén influíu á hora das inscricións, sobre todo, internacionais. Temos 111 portugueses, mais varios suízos, polacos e alemáns, e tamén un australiano.

-¿Xa está todo preparado?

-Temos todo posto en marcha, aínda que xa sabemos que neste tipo de eventos sempre hai imprevistos e cousas de última hora que amañar, ademais de velar pola seguridade dos ciclistas co control da circulación de vehículos que iso implica. Este aspecto é no que máis estamos traballando coa Garda Civil, a Policía Local e a Protección Civil dos distintos concellos para que todo saia ben.