«Cando levas aos participantes do Open Río Xallas ao Ézaro quedan sorprendidos»

Na novena edición do encontro participaron 34 parellas, e había 50 en lista de espera

.

Carballo / La Voz

Xa pasaron uns días dende que rematou o encontro, pero as boas sensacións perduran. Hai afeccións que medran, ademais, en familia. O coto de Xallas-Beba, situado no tramo do río Xallas comprendido entre o embalse da Fervenza e a desembocadura do río Beba -un dos poucos de Galicia regulados para a práctica da pesca sen morte-, vén de acoller a novena edición do Open Internacional de pesca a mosca por parellas Río Xallas, organizado polo Club Salmo de A Coruña, coa colaboración do Concello de Dumbría.

Detrás da organización están José Arcay (A Coruña, 1960) e Margarita Fernández, ambos pescadores e, ademais, pais de David Arcay, tricampeón do mundo que, despois de deixar Dumbría, saíu cara A Pontenova para outro campeonato e, de aí, cara Asturias, para adestrar para a proba a nivel estatal. Participaron no Open 34 parellas, téndose xa convertido nun dos encontros con máis prestixio a nivel nacional e internacional, unha plataforma para o mundo da pesca dende o punto de vista deportivo. É, tamén, unha oportunidade a nivel hostaleiro: todos os participantes, máis acompañantes e organización aloxáronse en Cee. José ten boas palabras para o Concello de Dumbría pola súa aposta polo deporte e por este Open: di que sempre axuda e que cada ano hai ganas de mellorar. «É un auténtico pracer».

-¿Que valoración fai da cita?

-Estivo máis ou menos na liña en capturas doutros anos, quizais un pouquiño por debaixo. Saíron 980 pezas, pero dado como está sendo o comezo de tempada de pesca en río, non está nada mal.

-Houbo participantes con títulos a nivel mundial, polo que o encontro xa ten un bo nome.

-Si, é o noveno Open que se leva celebrando e ten carácter internacional. Este ano tivemos franceses, portugueses, un arxentino... Moita xente de Castela e León... De todas as autonomías, máis ou menos.

-¿Que condicións ten o Xallas?

-Á xente que vén de fóra o río Xallas gústalle porque, nas datas nas que se celebra o Open, non se pode practicamente pescar a mosca seca en ningún río. Ese é un dos principais atractivos que ten.

-¿E que saúde lle ve?

-O río ten moitos peixes. Este ano, quizais teña algo menos de talla de media, pero iso non é malo, porque son crías do ano pasado, e iso é saudable para o río. O que si falta un pouco é a talla superior, pero pode ser polas condicións climáticas: os ríos van baixos de auga, as augas frías... De temperatura exterior pode haber 25 ou 26 graos e as augas están a 10 ou 12. Hai unha diferenza moi grande. Logo, hai outro problema grave, os cormoráns.

-¿Que impresión se levan desta zona os participantes, sobre todo os que veñen por primeira vez?

-Todos os anos, sendo 34 as parellas, temos estipulado que as cinco últimas descenden para que deixen sitio a outras, porque hai unha lista de máis de 50 para vir a este Open. Todos marchan encantados, e sobre todo os estranxeiros, porque non coñecen Galicia nin a zona. Chócalles a cultura, as paisaxes... A maioría dos participantes, aínda que sexan galegos, non saben que o Xallas desemboca en cascada, que é o único de Europa que o fai, e cando aos levas a ver O Ézaro quedan todos sorprendidos.

-Dende fóra, parece que a pesca deportiva está en auxe. Mesmo esa lista de espera para o Open...

-Demanda o Open do Xallas si que ten, e dende o inicio, cando era a un día de competición. Logo, coas peticións que había, optamos por facelo a dous días: a xente ten que organizarse única e exclusivamente para vir ata aquí. Polo tanto, demanda haina. ¿Que pasa? Que Galicia non ten a pesca como para dicir que a explote a nivel turístico e privado, como fai, por exemplo, Asturias. Fóra de España hai xente que vive de levar a outra xente a pescar, a guiala polos ríos... Vímolo nós hai pouco en Colorado, a cantidade de miles de millóns que move a pesca en EE. UU. é abrumadora. Non obstante, aquí, non está contemplado a nivel turístico nin profesional que alguén se queira facer guía de pesca para levar á xente aos marabillosos ríos que temos.

-Recursos hainos.

-Si, si. Ocorre tamén que a pesca sen morte aquí en Galicia tampouco está moi contemplada.

-Na súa casa a pesca é cousa de familia. ¿Xa lle vén dos seus antepasados esta afección?

-Meu pai pescaba, máis ben no mar, aínda que o río tamén lle gustaba. Eu comecei con el. Logo, nós empezamos a levar tanto á filla como ao fillo. Ela deixou de pescar aos 13 anos e David continuou, lévao facendo dende os 4.

Gañadores do Open

Primeira posición. Pablo Castro Pinos e David García Ferreras.

Segunda posición. Julián Nieto García e Manuel Ramos Andrade.

Terceira posición. Juan José Verde Vázquez e Jesús Bolaño García.

Cuarta posición. David Arcay Fernández e Jordi Oliveras Cortina.

Quinta posición. Javier del Río e Taillard Patrick Roger Pierre.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Cando levas aos participantes do Open Río Xallas ao Ézaro quedan sorprendidos»