«Non queremos esquecer que somos de onde somos»

A compañía fundada en Cee pechará este venres o ciclo «Dumbría á escena» e xa prepara a estrea dunha nova obra


A estrea da nova obra de Talía, Rosa Caramelo, prevista para o sábado pasado en Dumbría, tivo que adiarse un mes e buscar novo escenario, pero o público da localidade non quedará sen ver a Artur Trillo en acción. O actor e director estará o venres en O Ézaro (Edificio Bitácora, 21.30) cos seus compañeiros de reparto representando O método Grönholm.

-¿Como van os preparativos da nova obra?

-Hoxe acordamos estrear o 3 e 4 de outubro en Santiago, así que temos por diante dúas semanas de ensaios. É un espectáculo de pequeno formato, infantil, para nenos de entre 4 e 8 anos no que estamos en escena Fernando Fraga tocando o acordeón e eu mesmo contando varios contos da italiana Adela Turín que abordan a cuestión de xénero cun punto didáctico.

-Seguen alternando obras para distintos tipos de público.

-Desde o ano 2000 é unha constante da compañía ter cada ano un espectáculo infantil e outro de adultos novo, que se van sumando á oferta do noso cartel.

-Algún leva xa moitos anos no cartel. ¿Cal é o segredo desa lonxevidade?

-O que máis permanece no tempo é Bicos con lingua, que é do 2003 e que ten varios ingredientes para permanecer tanto tempo en cartel: é unha obra en clave de comedia que resultou moi ben entre o público; é un espectáculo no que nós divertímonos moito facéndoo, e o que conta é merecente de continuar con el, de seguir dando a batalla porque a situación da lingua non só non cambiou, senón que vai a peor.

-¿Que importancia ten o apoio do público da Costa da Morte para Talía?

-É gratificante ter o apoio do público, pero tamén dos concellos, que conten contigo e que apoien a liña de traballo que levamos facendo. E nós non somos indiferentes á comarca: damos clases por toda ela. O público tennos cariño e nós témoslle cariño a eles, é un afecto do que nos alimentamos mutuamente e por iso nos gusta moito actuar aquí. De feito esta semana estaremos en Dumbría, a próxima en Fisterra con Bicos con lingua e despois a Corcubión con Demolición. Non queremos esquecer que somos de onde somos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

«Non queremos esquecer que somos de onde somos»