A coristanquesa Lupe Blanco retoma logo das vacacións a súa particular análise da actualidade comarcal
13 sep 2020 . Actualizado a las 05:00 h.Na volta das vacacións,
vou comezar regueifando
que me botabas en falta,
sei que o estades esperando.
Comeza o novo curso,
a ver do que son capaces:
en vez de forrar os libros
imos forrar ós rapaces.
Haiche moito protocolo,
por se non o dixen antes:
mercarémoslles libretas
e varios desinfectantes.
Tamén digo unha cousa,
sen que me falte a voz:
os rapaces de hoxe en día
sonche máis listos ca nós.
Eles están concienciados,
escoitade a quen canta,
e tamén para os docentes
hai voto de confianza.
Pero a eses que gobernan,
voulle chamar a atención,
que tiveron todo o verán
pa mirar a educación.
Agora entroulle a présa
que hai que buscar a maneira,
pero o de ir improvisando
soamente vale na regueifa.
Pásalles coma no banco,
toma nota e non falles,
que vas á cola o domingo
para que te atendan martes.
En Carballo é moito conto,
para quen visita o banco
que co tema das distancias
chega a cola a Coristanco.
Aínda hai que ter paciencia,
éche moito traballiño,
pois nese tempo de espera
faise un pano de ganchillo.
A min iso non me pasa,
tamén o vou dicir,
que para o que hai na conta
non teño nada a que ir.
Xa vou dar un bo remate,
este final xa o noto,
poñede o tapabocas
se vos quitan unha foto.