A regueifa da semana: «Que pasada de despregue, para o ditador, só faltaba o branco e negro e o cheiro a alcanfor»
CORISTANCO
Xa chegamos a domingo,
e recórdovos agora,
que por se non o fixestes,
ide atrasando a hora.
Pois cambiou un pouco o conto,
se algún anda despistado,
que se non se deu de conta,
ten o reloxo adiantado.
Algunhas cousas non cambian,
por moito que mude a hora,
porque aquí en Coristanco
estamos sen depuradoras.
Non é que non as teñamos,
eu explico o que pasa,
é que por falta de arranxos,
temos a merda na casa.
Iso leva mal amaño,
e os veciños vamos fartos,
a escusa coma sempre,
é a faltiña de cartos.
A ver se agora en novembro,
lle prestan máis atención,
que nos toca pagar
iso da contribución.
Tamén hai cousas que cambian,
non coma en Coristanco,
mudaron de domicilio,
ó que quedaba de Franco.
Que pasada de despregue,
para ese ditador,
só faltaba o branco e negro,
e o cheiro a alcanfor.
E a anécdota do acto,
non foi todo o paripé,
que o piloto do aparato
disque é natural de Cee.
Unha cousa queda clara,
estamos en tódolos lares,
foi un bo profesional,
non o emborcou no Manzanares.
E seguiremos coa boria,
porque está de actualidade,
que atendan á educación
e tamén á sanidade.
Eu aquí xa me despido,
e por se non o sabían,
hoxe toca regueifar
por terras de Euskal Herría.