Mónica Montouto: «A pataca é un alimento moi beneficioso»

Doutora en tecnoloxía dos alimentos, participará na xornada técnica de Coristanco sobre a pataca, o venres 13

v. couto
carballo / la voz

No marco da 39ª. edición da Festa da Pataca de Coristanco, este venres, 13 de setembro, celebrase unha xornada técnica onde se abordarán cuestións diversas en torno á pataca, entre elas falarase das súas calidades nutritivas, ponencia que irá da man de Mónica Montouto, doutora en tecnoloxía dos alimentos e docente no centro de promoción rural EFA Piñeiral, en Arzúa. A xornada técnica será ás 16 horas no salón de actos do edificio de servizos múltiples. Mónica realizou a súa tese doutoral sobre a Pataca de Galicia.

-A pataca de Galicia que se cultiva en determinadas zonas está protexida por unha Indicación Xeográfica Protexida.

-No Diario Oficial de Galicia de xullo do 2010 é cando se aproba o regulamento da Indicación Xeográfica Protexida Pataca de Galicia do seu consello regulador, isto significa que esta pataca, de variedade kennebec, conta con unhas características determinadas e vaise producir nunhas zonas de Galicia determinadas e con unha serie de características. Dentro de iso recóllense catro subzonas de produción en Galicia, non en toda Galicia se pode producir Pataca de Galicia. Unha das zubzonas é Bergantiños, concretamente os concellos de Carballo, Coristanco, A Laracha, Malpica e Ponteceso.

-No regulamento tamén se inclúen unha serie de características en canto a calibre, forma...

-Si, esta normativa de calidade abrangue unha serie de cuestións en canto a produción e tamén en canto ao produto en si, a pataca. Debe cumprir unha serie de características dentro do punto de vista morfolóxico e tamén algunhas dende o punto de vista químico e nutricional. Isto último fainas diferentes do resto de patacas kennebec producidas en España. Algunhas desas características por exemplo son a forma do tubérculo, que ten que ser redondo ou oval, debe ter un calibre mínimo de 35 milímetros, debe ter unha pel fina e lisa con unha presenza de ollos superficial. A pel é de color amarelo e a súa carne ten que ser branca. Tamén se definen unha serie de cuestións sensoriais como que a súa textura en boca ten que ser firme, lixeiramente fariñenta e debe ser consistente en boca.

-Na ponencia vai falar das calidades nutritivas da pataca. Moita xente asocia pataca a moitos hidratos de carbono, calorías... ¿É así?

-Digamos que nos últimos tempos a pataca está un pouco denostada debido ás dietas hipocalóricas, de adelgazamento, onde penso que se excluíu de un xeito un tanto erróneo. O aporte calórico de 100 gramos de pataca é de 88 calorías, o de 100 gramos de pan é de 277; é dicir, ten calorías, evidentemente, pero tampouco é como para desbotala dunha dieta equilibrada. Como todo nesta vida, o importante é a cantidade e tamén a forma de cociñala, neste caso o tratamento culinario vai a facer que teña moitas máis calorías, non é o mesmo frita que cocida, por exemplo.

-A maior parte do contido da pataca é auga, ¿non?

-Efectivamente, ten unha elevada porcentaxe de auga, concretamente un 75% , o cal tamén indica que é un alimento moi beneficioso para o noso organismo.

-¿Estamos en tempos de facer promoción da pataca como alimento moi saudable e que se pode presentar de moitas maneiras?

-Exactamente, é un produto moi versátil que durante moitos anos foi un produto básico en Galicia, segue sendo un produto habitual nos noso pratos. É importante coñecer qué é o que nos aporta este alimento.

-A pataca chegou de lonxe.

-De lonxe si, ten unha historia bastante importante. A pataca constituíu durante moitos centos de anos un alimento básico de consumo dende que se atopou en Perú en torno ao ano 1500. A partir do século XVI xa se introduciu en España, e a partir de aí a Europa. Foi a culpable da gran fame que houbo en Irlanda, onde morreron milleiros de persoas debido a que a planta tivo unha infección e quedaron sen o sustento básico.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Mónica Montouto: «A pataca é un alimento moi beneficioso»