José Domínguez Buiturón: «O máis importante de todo é que gañe o pobo»

José Domínguez Buiturón (1959), expatrón maior de Corcubión, é o novo candidato do PP.

—Acaba de dar o paso á política municipal. Custou moito?

—Si e non. Hai cousas que son moi importantes para Corcubión e iso é o que me fai a min dar ese paso.

—Entra no sitio dunha histórica, Gema Freire.

—Unha persoa espectacular, moi traballadora e atenta.

—Son cinco partidos en liza. Como se ve a política local dende o PP?

—Dende o meu punto de vista podo falar máis de traballo que de política. Eu levo máis de trinta anos dentro dunha corporación de dereito público, e iso é o que me dá esta experiencia. O que máis importa é traballar. Ás veces déitaste derrotado e ao día seguinte érgueste para solucionar, mirar o que faga falta. Así se conseguen as cousas. A política debe de ir por aí. Espero que todos rememos na mesma dirección. Eu vou intentalo.

—A maioría absoluta parece complicada, e chegado o momento habería que pactar. Como o ve?

—Teriamos que analizar e consultar, pero a miña visión é, primeiro, agradecer a todas as persoas que se presentan á alcaldía esa vontade e querer o mellor para Corcubión. É así. Todos temos esa liña. Somos 1.670 veciños, e os políticos, aínda que nos custe, o máis importante de todo é que aínda que todos perdamos algo, pero que gane o pobo. Como nos 30 anos na confraría, nunca vai estar a gusto de todos, e se cadra perder algo ou chegar a acordos, pero hai que facer cousas. Xuntarme con todos e sentar as bases. Que gañe a xente. Non vou aí a buscar un soldo nin nada así. Facer cousas, como construír o porto deportivo, algo que quedou en nada outras veces. Hai un traballo grande xa feito. A min xa me encargaron que me ocupara deste tema no Náutico. Con esa dinámica eu identifícome, traballar e buscar o mellor.

—O do porto deportivo é o máis destacado do programa?

—Para min, con todos os respectos, si. É un gran investimento, de máis de oito millóns de euros. E multiplicar os aparcamentos previstos. E poñer barandillas en todo o paseo marítimo (poucas familias pasean por alí cos nenos por medo a caer). Xuntar o paseo co de Cee. Moitas cousas. Pero, o principal, o porto mixto, vou por el.

—Teñen agora un concelleiro. Que obxectivo se marca?

—A maioría. Se non se pode, intentar loitar polo pobo. E facer o mellor posible para Corcubión. Gustaríanos que o 28M Corcubión pintase de azul, sería marabilloso. Vemos que coas esquerdas non imos moi lonxe. Hai que convencer aos veciños de que o noso proxecto é o mellor. Hai moito que facer. Cando entrei na confraría era moi pequena. E pouco a pouco medramos: somos a que máis polbo vende da provincia.

---

---

---