Juan Manuel Rodríguez: «Liñares sempre será un referente, pero as decisións tomaraas o noso goberno»

«Hai que apuntalar o que está feito sen renunciar a afrontar novos retos», apuntou o novo rexedor de Cerceda


Carballo / La Voz

Ten 29 anos, é licenciado en Socioloxía, ten un máster en planificación e xestión de destinos turísticos e é afiliado ao PSOE dende o 2012. Incorporouse ás listas nas municipais de 2015, pero nun discreto posto de suplente. O gran salto deuno en maio de 2019 cando José García Liñares situouno no número dous, accedendo así á carteira de Benestar. A condena por prevaricación administrativa de Liñares abriulle as portas da alcaldía. A agrupación local avalouno e o mércores ratificouno o pleno, convertendo a Juan Manuel Rodríguez García no alcalde más novo da Costa da Morte. Agora afronta retos moi importantes para Cerceda, pero faino co aval da maioría absoluta da que goza o PSOE.

-Que lle comentaron os seus pais cando dixo que sería o alcalde?

-Os meus pais sempre sentiron unha gran admiración por Liñares, pero trato de mantelos á marxe do traballo. Isto foi algo que foi madurando co tempo e creo que eles se foron concienciando pouco a pouco. Agora lévano con normalidade.

-Por que entrou en política?

-Estudaba Socioloxía e a política serviu para canalizar algunhas inquedanza que levaba dentro. A socioloxía, como ciencia social, non deixa de ter no fondo unha gran vinculación coa política.

-Por que o PSOE?

-A nivel municipal, sempre tiven una gran admiración polo que se fixera no meu pobo. Non só na mellora dos servizos sociais, infraestruturas e os investimentos, senón pola capacidade de manter todos estes activos. Moitas veces é máis importante manter o que tes, que acadar novas cousas.

-En abril, cando a Audiencia Provincial aínda non se pronunciara polo recurso de Liñares e, polo tanto, non se sabía se podería presentarse á reelección, vostede xa era a alternativa?

-Non había nada oficial, si que había certo runrún. Cabía esa posibilidade, pero eu sempre me centrei en estar alí onde se me requirise.

-En maio de 2019 foi de número dous, por riba de xente con maior bagaxe e traxectoria política.

-É certo, pero eu represento a unha parroquia [Cerceda] que sempre estivo en postos moi elevados. Pero a min, os números non me din nada, sempre me importou máis o feito de ser e aportar, que de estar e iso sábeno moi ben as persoas que me coñecen.

-Como viviu todo aquilo do rexeitamento do recurso de Liñares por parte da Audiencia Provincial?

-Evidentemente foi complicado. Hai que respectar as decisións xudiciais, pero persoalmente pareceume unha inxustiza. Entristéceme porque por riba de todo eu sinto moito cariño, respecto e admiración por Liñares. Fóra do emocional, todo isto leveino con tranquilidade.

- Ver emocionarse a Liñares na súa despedida...

-Creo que foi pola situación xerada na rolda de prensa. Afloraron sentimentos, son moitos recordos, moitos anos representando ao Concello... As formas, ao mellor, non foron como a el lle gustaría. El fixo moitas cousas por Cerceda, pero eu a Pepe vino ben, tanto antes daquela rolda de prensa, como despois. O que creo que transcendeu daquela emoción é o amor que tiña, e ten, por Cerceda, algo que eu xa imaxinaba, pero estes meses no goberno permitíronme ver de preto que Pepe [Liñares] puxo Cerceda e os intereses dos veciños por riba de todo.

-É un marrón coller agora a alcaldía?

-Non. As cousas pasan e o que hai que facer é mirar cara adiante. Non hai que centrarse no negativo, senón no positivo. Hai moitas cousas polas que pelexar e é un reto de moita responsabilidade, pero tamén de orgullo persoal por ter a posibilidade de representar aos meus veciños. E a nivel de alcaldía, haberá un período de adaptación e de transición, pero se estou aquí é porque creo que estou capacitado para facelo. Pero isto non é cousa só miña, hai un grupo comigo, nos que todos teremos que dar un paso cara diante e facelo o mellor posible.

-Quen a vai levar a partir de agora a súa carteira de Benestar?

-Estamos pendentes da reorganización das áreas de traballo, pero a miña intención é que a leve outra persoa, pero non o podo dicir agora porque depende do que ditamine todo o grupo.

-Ser o alcalde máis novo da zona é unha vantaxe ou inconvinte?

-Unha anécdota, bonita en todo caso.

-Xa ten claro cales serán as súas liñas mestras de goberno?

-Cerceda é un referente no emprego, un concello coa taxa de paro máis baixa de toda a contorna e tamén é un referente en servizos, benestar social... Infraestruturas impropias dun municipio co peso demográfico de Cerceda e, polo tanto, é un concello moi avanzado. Non quero dicir con isto que xa está todo rematado, pero si creo que hai que apuntalar o que está feito sen renunciar a seguir facendo cousas novas. Se teño algo claro é que non sucedo a un alcalde calquera, senón que o fago de alguén que deixou o listón moi alto, cunha sombra moi alongada. O avance e o crecemento de Cerceda non se entenden sen Pepe. Ademais de emprego, as miñas prioridades son os servizos sociais, sobre todo benestar, mellorar as infraestruturas e manter todo o que se acadou ata o de agora.

-Como alcalde novo que é, pensa recorrer á experiencia de García Liñares?

-Hai que deixar clara unha cousa: Pepe ten moitos coñecementos, é unha persoa de moita confianza para nós, que tivo moitos asuntos da súa man. E é unha persoa absolutamente vixente no eido político. Sería moi inxenuo para os que quedamos non escoitalo e non ter en conta a súa opinión, A súa voz será sempre relevante... Eu sempre son dos que digo: escoito o que me din e fago o correcto.. Pero as decisións tomarémolas entre os que conformamos o grupo.

-O seu predecesor anunciou recentemente en La Voz de Galicia a cuarta ampliación do polígono en 428.000 metros cadrados.

-Si claro, é unha prioridade. O rural galego estase desmantelando e hai cuestións que abordar para seguir freando ese despoboamento. E hai que ter claro que sen emprego non se pode fixar poboación. A recualificación dos terreos no Acevedo xa está feita e é fundamental sacar este proxecto cara diante para atraer máis empresas e, polo tanto, máis emprego.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Juan Manuel Rodríguez: «Liñares sempre será un referente, pero as decisións tomaraas o noso goberno»