Con todas as forzas para seguir mellorando na ensinanza musical que se imparte día a día...
05 oct 2022 . Actualizado a las 05:00 h.Nesta primeira semana de outubro iníciase a actividade académica do novo curso 2022-23 na Escola de Música Municipal de Cee. Cúmprense 26 anos desde que se iniciara a ensinanza musical en Cee, alá polo ano 1996, empregando as instalacións do colexio Eugenio López e cun só profesor para atender aos alumnos que se interesaron por aprender a ler partituras e tocar algún dos instrumentos que entón se ensinaban. Curso a curso foron aumentando o número de profesores e alumnos e contouse con instalacións propias: primeiro no edificio situado na praza da alameda e despois no actual edificio da Casa de Cultura de Cee, con todo o cuarto andar dispoñible para dar as clases instrumentais e teóricas. Foron moitos os alumnos que pasaron por esta escola durante estes 26 anos e que puideron aprender e desfrutar tocando un instrumento. A maioría deles dedícanse hoxe a outros oficios, aínda que tamén outros continuaron estudios profesionais na música, pero seguro que esa afección pola música sempre os acompañará. No presente curso, a Escola de Música de Cee conta con 10 profesores titulados superiores da materia que ensinan e impártense 13 especialidades instrumentais, materias teórico-prácticas desde os 5 anos de idade e conta cunha banda de música desde o ano 1998 que serve para acoller a tódolos alumnos que se van formando na propia escola. Esta banda ten actividade musical durante todo o ano: pasacalles, procesións, concertos, gravacións. Toda unha experiencia musical para os instrumentistas que a integran que lles permite tocar non só pola Costa da Morte, senón por toda Galicia. Tamén fomentamos nos alumnos formados na Escola de Música de Cee que amplíen e proxecten a súa formación musical, superando as probas de acceso dos conservatorios profesionais e superiores da contorna, como son os de Carballo, A Coruña ou Santiago; presentándose a concursos dalgunha especialidade instrumental, como é o caso de dous alumnos que gañaron por dous anos consecutivos o certame de acordeón de Ponferrada; asistindo a cursos de perfeccionamento instrumental... Con todas as forzas para seguir mellorando na ensinanza musical que se imparte día a día, comezamos este novo curso escolar na Escola de Música Municipal de Cee. Claustro de profesores da Escola de Música Municipal de Cee.