Anxo Lorenzo: «As fundacións deben estar implicadas na sociedade, ser útiles»

patricia blanco CARBALLO / LA VOZ

CEE

ana garcia

Anxo Lorenzo, director xeral de Políticas Culturais, visitou onte o museo da Fernando Blanco, en Cee, e coñeceu as súas necesidades

22 jul 2020 . Actualizado a las 05:00 h.

Respondendo a un convite feito dende a Fundación Fernando Blanco para visitar as súas instalacións en Cee, tanto o museo como o centro educativo directamente ligado, o director xeral de Políticas Culturais, Anxo Lorenzo, acudiu onte á vila da Xunqueira, onde tamén foi recibido pola alcaldesa, Margarita Lamela. «Era unha visita prevista para o 16 de marzo e que non se puido facer polo estado de alarma. Quedamos en que iría logo do período electoral, e así foi, unha visita de cortesía», di Lorenzo. Comentáronlle, doutra banda, que hai diversas cuestións nas que lles gustaría, dende a Fundación, establecer colaboración coa Xunta de Galicia: «Agora estou á espera de recibir esas solicitudes, ese tipo de necesidades que teñen, para poder valoralo». O director xeral de Políticas Culturais puido achegarse, ademais, ata Fisterra, para avanzar nalgún proxecto futuro do que, de momento, prefire gardar detalles, mentres non estea aínda de todo maduro. Nun 2020 marcado polo covid, fala en positivo.

Regístrate gratis y recibe cada mañana en tu correo las principales noticias del día

-Xa se tivera chegado algunha vez ao museo da Fundación Fernando Blanco? Que idea leva?

-Coñecíao de referencia, pero nunca estivera alí. É un espazo que se ve que está moi ben coidado, tamén as pezas alí musealizadas. O estado de conservación é moi bo, e iso é positivo porque para este tipo de infraestruturas moitas veces o paso do tempo é implacable. A museografía do Fernando Blanco é de moi alta calidade e teñen ademais un técnico, Darío Areas, que coñece perfectamente de que está falando, todo o material e as implicacións do que significou a persoa de Fernando Blanco no ámbito de Cee e da Costa da Morte. Fixo fortuna nas Américas e encargouse de que boa parte do que alí conseguiu reverterse na comarca e no lugar do que procedía. Grazas a iso moitas persoas estudaron, tiveron unha educación e unha cultura, durante moito tempo. Nese sentido, a Fundación Fernando Blanco é unha homenaxe que se lle rende a el, á súa figura, a esas persoas imprescindibles na historia de Galicia.

-Existen na comarca fundacións que foron perdendo actividade, mais esta é moi dinámica, que debería ser o obxectivo último.

-Si, para que teñan tamén un sentido, deben estar implicadas na sociedade, ser útiles, ter un plan de actividades. Hai uns fins fundacionais, pero ademais deben estar adaptadas aos tempos, á situación e ás necesidades do lugar onde están encravadas. Evidentemente, a figura de Fernando Blanco e o seu legado teñen que ser as protagonistas do museo, pero logo ha de haber un plan de usos e de traballo que amplíe os bordes deste núcleo principal e que se conecten con outras iniciativas interesantes da localidade e da propia comarca.

-Caso da Pondal, por exemplo.

-Exactamente, si.

ANA GARCIA

-Teñen dende a Xunta algún tipo de reunión periódica coas diferentes fundacións?

-Si, establecemos hai uns anos unha dinámica de relación, cunha xuntanza anual que, de feito, tocaba no mes de xuño, pero que non puido facerse. Recuperarémola antes de finais deste 2020. Se non recordo mal, íase facer en Ourense, na casa de Otero Pedrayo, no Pazo de Trasalba. Este ano, ademais, esa reunión servirá entre outras cousas para reivindicar e celebrar o centenario da Xeración de Nós. Esa dinámica de colaboración mantémola e esas reunións de casas museo e fundacións de artista faranse.

-O covid-19 tivo fondo impacto na cultura, nas Letras, na organización de actos e reunións...

-Certo, si, trastocou e mudou todo, pero hai que adaptarse e amoldarse ás novas circunstancias. Tamén aos ritmos. Non queda outro remedio que asumir a situación e buscar solucións, que é o que intentamos facer entre todos. O importante agora é superar esta crise sanitaria e despois, pouco a pouco, irase reprogramando e movendo as cousas para ilas sacando adiante.