«Segue faltando moita xente nova que acuda aos espectáculos culturais»

Xa en marcha o Mes da Fundación Fernando Blanco, cun programa cheo de actividades. Cóntao o coordinador do museo e secretario da Fundación, Darío Areas


Carballo / La Voz

Entre axudas da Deputación e o patrocinio do tecido empresarial da localidade, dende a Fundación Fernando Blanco deseñan anualmente todo un mes de actos para render homenaxe ao intelectual ceense. Darío Areas, coordinador do museo e secretario da Fundación, conta os detalles.

-Como lles foi a Marta Ortiz e Sofía Espiñeira con «Matrioskas»?

-Pois o certo é que moi ben, e máis tendo en conta que, ao ser sábado, había «competencia» [ri] en localidades próximas, como Vimianzo ou Muxía, onde tamén había teatro. Pero non temos queixa, a verdade é que temos un público que é moi fiel aos actos do Mes da Fundación. E, ademais, sempre intentamos traer propostas distintas, que non se viran nunca na Costa da Morte, polo que tamén é un incentivo.

-Cheo o auditorio?

-Ui! Encher encheron Carlos Blanco e Luís Davila, e cando se representou Eroski Paraíso [ri]. O auditorio de Cee ten máis de trescentas localidades e é moi difícil completar o aforo, pero aínda así creo que habería máis de cen persoas, polo que moi contentos.

-Só teatro e música este ano.

-Polo xeral incluiamos conferencias, si, pero este ano os dous poñentes que tiñamos en mente non podían vir, polo que finalmente cinguímonos ao teatro e á música. En Cee hai unha grandísima tradición teatral, en boa parte nacida no Fernando Blanco. Creo que por iso a xente o valora tanto e acode ás citas.

-Que teñen preparado para o que resta de mes?

-Pois, ademais deste primeiro espectáculo que tivemos o sábado, esta fin de semana estará un rapaz pontevedrés moi polifacético, Marcelo Dobode, que fará un concerto comentado. Soa así algo raro [ri], pero non deixa de ser unha mestura de charla e concerto, aínda que predominará o aspecto musical, claro. O día 20 teremos a tradicional ofrenda floral no sepulcro de Fernando Blanco e serán os mozos que recibiron as bolsas da Fundación os que porten as coroas.

-E o gran Quico Cadaval...

-Ese mesmo día, ademais. Falar de Cadaval é como falar do Real Madrid ou do Barcelona no ámbito do fútbol: é do mellor que hai na escena galega, xunto con Carlos Blanco e Cándido Pazó, ao meu parecer. Xa estivo con nós noutras ocasións e esta vez terá un monólogo con temática baseada na Guerra Civil. A última peza para público xeral será un concerto do dúo Falúa, con Sara de Sousa á voz e Gonzalo Goás aos instrumentos, que traerán «Músicas da lusofonía».

-E que presentarán para os rapaces dos colexios?

-Esa parte do programa comeza mañá, de feito, cun espectáculo ao que, ademais dos nenos dos colexios, tamén convidamos aos usuarios de Aspadex. É unha función teatral cunha mensaxe moi bonita de amizade entre un neno do Congo e unha rapaza galega. Tamén haberá un contacontos con Caxotos e un espectáculo de narración oral con Raquel Queizás, que lles ensinará aos nenos que as pedras non só son pedras, senón que algunhas, como os petróglifos, teñen gran valor.

-Os mozos dos institutos si que presenciarán algunha charla.

-Iso é. Por unha parte teremos o xoves 25 unha conferencia de Sabela Oca e Alexandra Bello -dúas rapazas que traballan en CLUN- sobre o poder dos alimentos. E ademais tamén virá Casto Rivadulla [Doutor en Bioloxía e profesor de Fisioloxía na UDC] que falará do funcionamento do cerebro, das neuronas etc. Cousas que se me quedan algo lonxe, porque eu son de letras puras [ri], pero que é superinteresante. Hai tempo viñera Xurxo Mariño a falar de algo similar e fora a conferencia que máis gustara de todas as edicións. Non só os temas son atractivos, senón que eles o fan tamén interesante.

-Que tal funciona o museo?

-Pois vimos de adoptar o horario de inverno [martes a venres, de 10 a 13 e os sábados de 10 a 13 e de 17 a 19 horas] e a partir de agora funcionaremos moi ben cos colexios, que veñen de visita.

-Os nenos amosan interese pola colección exposta?

-A maioría vanse moi sorprendidos. Os de Cee non tanto, porque xa o coñecen, pero si os de fóra. Dende a historia que se relata da emigración, ata a propia edificación do instituto ou o feito de que un home destinase a súa fortuna ao pobo, e non a gastala en viaxes ou vicios.

-Aínda haberá quen non coñeza a historia de Fernando Blanco.

-Pénsoo moito cando a xente colga as fotos das súas viaxes nas súas redes sociais: o Prado, o Louvre... E teñen un museo aberto ao lado da casa dende hai moitos anos e aínda non o pisaron. A xente maior coñece ben a súa historia, os novos... non tanto. Falta moita xente nova, en xeral, nos espectáculos culturais. A media de idade é moi elevada, e por iso facemos tanto fincapé en difundilo a través dos colexios.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Segue faltando moita xente nova que acuda aos espectáculos culturais»