No encontro, ademais de numerosos alumnos, estaban presentes varios profesores do instituto e a propia directora, Chelo Trillo Lago, que participou na posta en marcha da xuntaza. A escritora e exprofesora de Cee Concha Blanco, a raíz das referencias de Neira ao paso de Pondal por Nemiña, falou do seu paso como mestra pola súa primeira escola nesta localidade de Muxía, onde tiña que cruzar en barca o río Castro tódalas semanas. Logo, recitou o poema icónico dedicado ao dolmen de Dombate. Por último, houbo a intervención dos alumnos Elisa Lema Gómez, con E ti campana de Anllóns, e Tomás Lagoa Blanco, con Dous rapaces non sei donde, outras dúas creacións do bardo pontecesán.
