A lectura prende en Carballo: soben a tres os clubs de adultos

Botou a andar este venres en Carballo o club de lectura en galego para adultos da biblioteca Agra de Campos, e ese inicio foi inmellorable escusa para dar cadra da media ducia de clubs de lectura municipais que estarán en marcha este curso na vila, os cinco restantes na biblioteca Rego da Balsa, para crianzas de 0 a 6 anos, para pequenos de 7 a 12 e para adolescentes de 12 en adiante, ademais de dous para adultos, un especificamente en galego e outro no que se combinan lecturas en castelán.

A expansión dos clubs de lectura nos últimos tempos é un fenómeno tamén presente aquí, e de feito este 2026/2027 soben a tres as iniciativas para maiores de idade, todas elas coordinadas pola escritora e xornalista malpicá Marta Villar, un labor que no caso dos menores asumen Sara Varela e Nerea López. O aumento débese á lista de agarda, explicou a edila de Bibliotecas, Arquivos e Normalización Lingüística, Ángeles Pacoret, quen tamén desvelou que hai lista de agarda para o novo taller de escritura creativa, con candidatos mesmo de 12 anos. Tamén o dirixiría Marta Villar: «O seguinte paso é a alcaldía», riu ela. A ledicia é colectiva. Pacoret aludiu ademais a outras propostas, como son Rompendo barreiras e Ti tamén podes, antes de incidir en que pretenden que as dúas bibliotecas sexan «espazos abertos, vivos, dinámicos, seguros, onde poidamos aprender, conversar e crear». Máis que meros préstamos. O reto: enganchar máis ao público adolescente.

---

---

---