Cando menos, dúas citas comerciais destacadas este 10 de mio: en Carballo e en Baio
10 may 2026 . Actualizado a las 05:00 h.Corpo e espírito. Máis alá das feiras semanais, as dúas citas comerciais desta fin de semana —BioSaúde co CCA en Carballo e Feira das Letras con BaiOn e Concello de Zas en Baio— unen eses dous conceptos. Na noite do venres, o protagonismo nos sete locais participantes na Ruta de Tapas baiesa tíñano eses petiscos a 2,50 euros, pero tamén o partido do Dépor. En Casa Rogelio serviron cachopo con forza e no Trébol os padais saboreaban propostas como ese montadito cubano con carne mechada, cebola e un toque de lima. Xa pasadas as oito da tarde había bo ambiente, xeracións distintas, e aínda estaba por vir toda a xornada de onte, na que seguía a gastronomía, os descontos en tendas e botaba a andar a programación cultural e lúdica na carpa da praza Jorge Mira. Abriron dun xeito dinámico Xosé Manuel Varela e Nerea Gomez, coautores de Begoña Caamaño.
Hoxe seguen as tapas, seguen os descontos (busque os locais identificados!) e as citas culturais: pasarrúas con Churía e Adro (12.00), encontro arredor da memoria histórica con Luís Lamela e Josefa Suárez (12.00), pases do mago Antón ás 13.00, 17.00 e 18.30, diversión infantil toda a tarde a base de rocódromo, tirolina e inchables, charanga Os Atrevidos (17.30) e presentación do libro infantil e xuvenil O mapa da túa sexualidade, de Laura Veiga (18.00).
No mercado de Carballo
A xulgar polas treboadas intermitentes, foi ben acaída a decisión de levar a cuberto a segunda edición de BioSaúde en Carballo, un encontro e espazo arredor do benestar impulsado dende o Centro Comercial Aberto (CCA). Con 17 proxectos nos expositores, aínda está a tempo de pasar pola segunda planta do mercado municipal, onde de 10.30 a 14.00 horas ofrecen os seus productos e prestacións A despensa que pensa, O Lagar, Aloe Estética e Herboristería, Anxaina, Íntegro, Azue Vida Natural, Codesal Mel e Licores, Lácteos Ameixenda, Mary Kay, Refugallo Zero, Ritello A Coruña, Sentires, Studio ZCV ou Zucaro. Onte, nas primeiras horas, pasaron polos postos un bo número de concelleiros, tamén o alcalde, Daniel Pérez. A tarde aínda se animou máis.
Talleres, charlas e faladoiros tiveron boa acollida, e segue tamén hoxe. Máis alá da dieta, con Lidia Troitiño, ás 11.00; cosmética natural para pel madura e taller de maquillaxe en procesos oncolóxicos, con Ana Rodríguez, Ángeles Barallobre e Elisa López (12.00) e cata/degustación de vermú ecolóxico e callos do restaurante Albaroque da man de Adega O Lagar (13.00). Outra parada esencial, a quinta Pequefeira, mercado de artigos con materiais reciclados de 12.30 a 13.30.