Unha romaría de meigas e veciñanza, no cartel do San Xoán de Carballo 2026

A artista carballesa Isa Bermúdez confesou este martes que acaba de ver cumprido un soño «de sempre»: dar vida ao cartel das festas patronais da súa terra, o San Xoán. A imaxe vén de coñecerse e a satisfacción coa proposta é unánime. Saíu o sol no xardín municipal e para Maruxa Suárez, concelleira de Cultura e Festas, ben pode ser sinal «de que teremos un San Xoán solleiro». A comisión de festas, integrada por 15 persoas, decidiu este ano mudar o proceso para a creación do cartel, deixando a modalidade concurso que se viña facendo ata o momento e optando por encargallo directamente a artistas carballeses. «Fixemos unha listaxe e decidiuse por unanimidade encargarllo nesta ocasión a Isa, cada ano será un», avanzou a concelleira. Para Sergio Varela, presidente da entidade organizadora, os resultados amosan que a decisión non puido ser máis acertada: «É un cartel que conxunta moi ben todo o que ten o noso San Xoán». Explicouno a propia Bermúdez, agradecida coa nova modalidade e coas «condicións dignas» que facilitan un bo traballo. 

Quixo ela explicar nun cartel, sobre todo aos que cheguen de fóra, «todo o que pasa aquí en Carballo no San Xoán». O seu debuxo é unha romería estampada sobre un fondo desas herbas que se procuran para a noite do 23 de xuño, unha romaría protagonizada por esas meigas que a lenda sitúa no Monte Neme facendo a súa propia cachela. Familia e amizade. Unha romaría de meigas e veciñas, e «algún animaliño por aí», así como un neno portando un caldeiro para a auga do San Xoán, unha sardiña a modo de dragón chino, unha banda de gaitas e, todo isto, cun aire fantasioso alusivo á infancia. É a época na que, quizais, máis marca o San Xoán, é aí cando impregna todas as lembranzas. Bermúdez quitoulle pátina negativa ás meigas, que ás veces non eran máis que «mulleres que sabían de herbas»: «Todos en San Xoán facemos rituais que semellan de meigas. Hai un pouco de maxia en todas as festas, no San Xoán dende logo».

Daniel Pérez, alcalde, estendeu esa «ilusión» pola festa patronal ás idades máis maduras, unha celebración que é en verdade «soño». Trasladou os seus parabéns á creadora e á comisión, pola decisión tomada: «En Carballo hai canteira artística e esta é unha maneira de visibilizar o talento, do que es un expoñente, ti es a primeira, abriches camiño. Feliz San Xoán e a disfrutar!», trasladoulle a Isa. Daniel Barreiro, edil de Deportes e Mocidade, avanzou que, en vindeiros días, se irán coñecendo pezas do programa deste ano: «Vén con novidades». 

---

---

---