Carballo porá o foco este 25N na violencia dixital sobre as mulleres

O Concello de Carballo vén de presentar a súa programación en torno ao 25N, Día Internacional da Eliminación da Violencia contra a Muller, un almanaque de propostas que este ano poñerán o foco na violencia dixital e que, con todo, tal e como reivindicaron tanto a edila de Bibliotecas como a de Igualdade, Ángeles Pacoret e Maica Ures, non é traballo só dunha xornada ou dunha semana.

«O 25N ha de deixar de ser unha data anecdótica no calendario», afirmou Pacoret. Debe servir, dixo tamén, para escoitar a voz de todas aquelas mulleres que sufriron algún tipo de violencia e debería ser ademais «un canto de esperanza» cara unha sociedadade máis cohesionada «na que o medo non teña cabida». Estes arredor do 25 de novembro, afirmou a edila de Bibliotecas, son días para facer unha pausa, observar, reflexionar e sobre todo actuar: «Como sociedade temos unha responsabilidade».

Proba de que en Carballo a loita vai máis alá dunha programación illada son as súas bibliotecas. Tanto na Agra de Campos como na Rego da Balsa, que acolleu a presentación deste ciclo, hai un amplo catálogo de libros, música e tamén filmes para abordar cuestións como o feminismo, a igualdade, a educación sexual e afectiva ou a diversidade: «Unha sección permanente» á que convidou a visitar, poñendo énfase especialmente nos contos dirixidos aos máis pequenos: «Son os homes e mulleres do futuro». Por aí, pola transformación persoal, comeza todo, para logo poder dar paso a unha transformación social». «As violencias machistas, lacra social, non se dan só nun día nin nunha semana. Violencias físicas, psicolóxicas, dixitais», enfatizou Maica Ures, encargada de debullar a programación, que pode consultar ao final desta nova. 

Nesa especial ollada ás violencias dixitais, o acto central será o 27 de novembro, un café debate sobre esta «violencia de xénero do século XXI». Xa no 2017 se tivo abordado na capital bergantiñá, pero dende entón moitas cousas mudaron, entre elas a existencia dunha lexislación datada do 2024, como explicou a carballesa Eva María Souto García, profesora titular de Dereito Penal da Universidade da Coruña (UDC). Foi ela quen deu as claves deste encontro que permitirá clarificar varias cuestións: Que é o xénero? Que é a violencia de xénero? Que é a violencia dixital? Que son as deepfakes? E como se aborda todo isto dende a perspectiva do dereito penal?

Ademais da propia Eva María Souto tomarán parte neste café debate José Antonio Ramos Vázquez, profesor titular de Dereito Penal e maxistrado suplente da Audiencia Provincial da Coruña, así como Ana María Neira Pena, profesora e directora da Oficina para a Igualdade de Xénero da UDC.

Souto García agradeceu dende a biblioteca Rego da Balsa a oportunidade que esta cita do 27 de novembro ofrecerá para achegar á sociedade o traballo que se fai en universidades e centros de investigación, así como na Oficina para a Igualdade de Xénero da USC, que ten por exemplo un protocolo de acoso sexual ben definido: «Precísase un cambio social, educacional e de divulgación», afirmou, convencida do potencial do «control social informal», do que poden supoñer nese camiño as familias, os amigos, as asociacións, «máis alá da norma, que evidentemente é necesaria». Máis aínda nun contexto que a cada paso se visibiliza máis a violencia exercida pola muller polo mero feito de ser muller. Fai falta unha intervención integral.

Prácticas como o sexting, o grooming ou esas deepfakes, imaxes manipuladas con intelixencia artificial partindo dunha imaxe real, serán abordadas en Carballo. «Anticiparse coa prevención ante o pequeno evita o máis grave», afirmou a docente: «Toda canta iniciativa de divulgación nos faga saír dos despachos é moi interesante», engadiu. Dado o interese, será necesario inscribirse a través da páxina web carballo.gal. 

Daniel Pérez, alcalde carballés, pechou a ronda de intervencións agradecendo a implicación das áreas organizadoras, así como a da UDC: «O 25N é un día de loita, pero a loita contra a violencia machista ten que selo os 365 días do ano. E lembrar que isto non é unha cuestión de mulleres. Os homes somos os primeiros que temos que entender que a violencia de xénero require a nosa implicación». Como Pacoret, convidou a buscar nos libros un xeito de «saír da zona de escuridade»: «Temos moito que avanzar, e máis aínda nas violencias dixitais, a última expresión dunha violencia contra a muller que leva existindo dende sempre. As Administracións, e tamén a nivel social e educativo, temos unha responsabilidade. A educación é iso que permite facer clic. Ao final todo isto é respecto. Hai moito que aprender e, na lexislación, tamén moito por regular. A lexislación sempre vai por detrás da sociedade. Fai falta nela, ademais, unha perspectiva de xénero», afirmou Pérez, avogado antes de ser rexedor. 

 

---

---

---