Orgullo de mulleres, de investigadoras e tamén orgullo de Carballo

Difundir os seus nomes, poñerlles rostro, coñecer aquilo que fan, outorgarlle valor, sentir orgullo dunhas veciñas que investigan en diversas disciplinas e coas que un pode cruzarse na rúa. «En Carballo temos as mellores mulleres, as máis guerrilleiras e as mellores investigadoras»: foron estas, este sábado, palabras de Iván Andrade, edil de Innovación, na apertura da exposición Mulleres guerrilleiras: investigadoras de Carballo. Dixo tamén, aludindo a Hipatia de Alexandría, que unha verdade non deixa de selo porque sexa crida ou non pola maioría. Esa afirmación súa, por tanto, éo.

Son 21 nomes, fotografías e traxectorias. Poderían ser máis, é unha exposición en crecemento, mais son as que se puideron reunir para este momento. «Quizais un día se quede curta a rúa Coruña e mesmo chegue a facer falta a Gran Vía», afirmou Andrade. A mostra, no programa da segunda Feira do Día da Muller e a Nena na Ciencia —cuxa xornada grande será este domingo 9 de febreiro—, faise nun contexto de colaboración do Concello co festival Pint of Science, que en maio volverá á vila e cuxo comité virá a Carballo o 22 de febreiro.

Orgullo de mulleres, orgullo de investigadoras, «pero tamén deixar claro algo, que son de Carballo, o xen carballés». Unha mostra «sinxela» na que, coas súas propias palabras, as 21 explican cal é a súa ocupación e, case como chanza, aquilo que elixirían se tivesen que facer unha investigación sobre Carballo. Das 21 participantes, e da quincena presentes, tomaron voz tres, a primeira delas Désirée Domínguez, agradecida por considerar que a súa traxectoria pode ser «referente para as nenas» e convencida de que é importante fomentar as vocacións científicas entre elas, mais tamén as ciencias sociais e humanidades.

«Grazas ao Concello por esta aposta decidida por visibilizar a ciencia. Sinto orgullo desta nova imaxe que se fomenta», afirmou, do seu lado, Verónica Bolón. Felicitou ás compañeiras e, en terceiro lugar, desexou que chegue o momento no que o Día da Muller a Nena na Ciencia non sexa necesario. Mais hoxe éo, e para mostra un dato: «Na Real Academia de Ciencias de España só hai un 4 % de mulleres académicas, estase traballando para mellorar isto, pero de momento as cifras son así».

«Visibilidade» e «inspiración» son as dúas palabras que para María Andrade definen esta proposta. Son 21 nomes, como o seu, pero cun matiz: «Detrás do traballo de cada unha de nós hai un enorme esforzo colectivo, en moitas ocasións tamén liderado por mulleres». Ela ampliou a fachenda de capital humano «a todas as mulleres no seu traballo». «Un día coma o de hoxe incrementa aínda un pouco máis o orgullo de ser carballeses e carballesas», rematou Evencio Ferrero, alcalde. «A sociedade ten que ir na dirección da igualdade», reivindicou perante unha exposición que é «escaparate do que temos», nun pobo comprometido que desbota estigmas para evidenciar os seus valores: «As mulleres sodes un valor moi grande». Incluso o fío musical foi este sábado tamén feminino: antes das palabras soou Antía Muíño ou Silvia Pérez Cruz. 

---

---

---