As 21 «guerrilleiras» carballesas no eido da investigación, xuntas nunha exposición

CEDIDA

Inauguración este sábado • 12.00 horas • A Carballo volverá esta fin de semana a Feira do Día da Muller e a Nena na Ciencia, co ánimo de xerar vocacións científicas e referentes femininos. É nese contexto no que se sitúa tamén a exposición Mulleres guerrilleiras: investigadoras de Carballo, cuxa inauguración está prevista para este sábado, ás 12.00, na rúa Coruña, aberta ao público. É unha iniciativa das áreas municipais de Innovación e Igualdade para poñer en valor e divulgar o traballo que desenvolven mulleres do municipio en proxectos de investigación sumamente diferentes, dende as enxeñarías ao dereito, pasando pola socioloxía, a medicina, a bioloxía ou a informática. A mostra, segundo dá traslado o Concello, enlazará dúas datas simbólicas, o 11 de febreiro, Día da Muller e Nena na Ciencia, e o 8 de marzo, Día Internacional das Mulleres. É tamén ao redor destas datas que o consistorio desenvolve actividades que teñen por fin común impulsar as vocacións STEM entre nenas e mozas, fomentar a incorporación das mulleres a profesións masculinizadas e difundir os avances sociais que se están a acadar co traballo destas 21 mulleres guerrilleiras: investigadoras de Carballo. É unha exposición en fase de crecemento, que irá medrando, quizais abríndose a outros campos no que hai carballesas referentes.

«As mulleres que nos levaron á lúa», no mercado municipal

Ata o 13 de febreiro • Igualmente no contexto das actividades arredor do Día da Muller e a Nena na Ciencia, entre os postos de venda do mercado municipal de Carballo, poden visitarse dende hai uns días 12 pósteres, tipo roll up, sobre mulleres que tiveron un destacado papel para que a chegada do ser humano á Lúa fose realidade. Aquel 21 de xullo de 1969 marcou un antes e un despois na historia da navegación espacial, pero cinema e literatura, e mesmo libros de texto, centráronse na figura dos astronautas, invisibilizando o traballo de nomes como Annie Easley, Rita Rapp ou Frances Northcutt, claves no éxito da misión do Apolo XI e posterior conquista do espazo. Estudaron, calcularon e comprobaron unha e outra vez que todo funcionase, pero quedaron ocultadas durante moito tempo. Deben saír á luz, traslada o Concello, para servir de modelo. Pódese saber máis delas, en Carballo, ata o 13 de febreiro.

Convenio co Grica para achegar o coñecemento científico á poboación

Exposicións como as arriba mencionadas, ou tamén a feira e mesmo o festival Pint of Science, son propostas coas que a área municipal de Innovación carballesa trata de fomentar o interese pola ciencia entre a poboación. Nesta mesma liña, o edil Iván Andrade vén de asinar un convenio de colaboración co Grupo de Investigación en Cambio Ambiental (Grica) da Universidade da Coruña, para impulsar outras actividades neste ámbito. É o caso do taller sobre formación e observación de fósiles, onte co Programa Apego, ou do obradoiro sobre tempo xeolóxico que haberá este domingo. Outra das citas próximas: un obradoiro sobre a Lúa, o 19.