«O máis importante do transplante é que ofrece unha calidade de vida»

A prestixiosa cardióloga Marisa Crespo Leiro (Cea, Ourense; 1961) será unha das intervintes no segundo Encontro Médico de Bergantiños, que se celebra hoxe pola mañá no Pazo da Cultura de Carballo. Crespo, medalla de ouro e brillantes do Colexio Médico da Coruña, medalla Castelao e vicepresidenta da Sociedad Española de Cardiología, é unha referente internacional nesta especialidade, cun currículo abraiante: profesora titular de Medicina na UDC, coordinadora do Grupo de Investigación de Insuficiencia Cardíaca Avanzada e Transplante Cardíaco do Instituto de Investigación Biomédica; xefa de grupo no Chuac do Centro de Investigación Biomédica en Red Cardiovascular, e coordinadora do Rexistro Español de Tumores post-transplante cardíaco. «É unha honra participar neste encontro médico», dixo onte en Radio Voz Bergantiños.

—Un dos organizadores, Álex Ávila, dixo de vostede que é unha excelente comunicadora. Isto, no corazón senta ben, non?

—Inténtase. O corazón é un órgano moi importante no noso corpo. É importante comunicar e transmitir boas sensacións.

—Para o acto de hoxe, que será sobre as 13.00, Ávila pediulle unha charla sobre o transplante do corazón, no que o Chuac é un punto crucial. Que vai contar?

—Os transplante cardíaco é un tratamento moi complexo, que só é para pacientes con insuficiencia cardíaca avanzada, sen outra opción. E, neste sentido, o noso centro é o de referencia para Galicia. Xa levamos máis de 30 anos de percorrido, e é un dos tres centros de máis volume de actividade de España. Eu levo aquí 30 anos (cúmproos este ano). Cando cheguei había 40 transplantes realizados, e hoxe temos máis de 900. O máis importante do transplante é que ofrece ao paciente unha gran calidade de vida, unha melloría na supervivencia. E todo débese á xenerosidade dos donantes e a un traballo en equipo, no que participamos moitísimas persoas do hospital. E iso é o que nos dá unha gran satisfacción e un gran agradecemento aos donantes.

—Cales son os retos da cardioloxía e do transplante?

—A cardioloxía é unha das especialidades máis interesantes e con máis esperanza da Medicina. Cada vez hai máis avances, incluído o transplante. Cada vez necesítanse mellores fármacos inmunodepresores, con menos efectos secundarios, para prolongar a vida dos pacientes. E síntome moi honrada de ter sido elixida vicepresidenta da Sociedade Española de Cardiología.

«Hai moitos factores de risco controlables»

Crespo xa vai quedar ligada dalgún xeisto a Bergantiños tras estas xornadas especializadas.

—Tiña vostede algunha relación con esta comarca?

—Nada! Só que me encanta. Son de Ourense, de Cea, onde o mellor pan. Fixen a carreira en Santiago. Logo Madrid, Toledo, e dende hai 30 anos xa aquí. Eu non coñecía esta zona, e gracias a todos os visitantes e amigos, é onde os levo. Para min é unha honra poder estar aquí.

—Di Ávila que estas iniciativas pretenden achegar a medicina ao gran público, humanizala... Que temos que facer para ter ben coidado o corazón?

—Evitar os factores de risco. Hai moitos, e son evitables ou controlables, como o sedentarismo. E tendo unha dieta cardiosaudable. Hai que controlar a tensión, a diabete, o colesterol. Facer exercicio físico. Evitar o tabaco, evitar os tóxicos... Se evitamos eses factores de risco xa sabemos que diminuimos o risco de ter un problema no corazón.

---

---

---