Evencio Ferrero, BNG de Carballo: «Só vexo tres candidaturas con opcións para o salón de plenos»

Logo de vinte anos como alcalde de Carballo, e de formar parte da corporación dende as primeiras eleccións do período democrático, Evencio Ferrero (1955) volve aspirar á reelección polo BNG.

—Como foi a campaña?

—Pois desenvolveuse con bastante normalidade, que é sempre o desexable. E a nivel persoal, pois xa hai suficiente bagaxe como para saber dosificar. Ademais, a candidatura do BNG está tremendamente activa, con moita xente implicada, co cal o traballo está moito máis repartido.

—Tardou en despexar a incógnita de se repetiría ou non como candidato. Por que?

—Formaba parte da estratexia. Non foi por ningunha razón política ou persoal, senón para xogar un pouco con esa interrogación. No obstante, creo que finalmente ninguén se sorprendeu de que continuase.

—Seis partidos en liza. E iso que Terra Galega desistiu de concorrer.

—Si, foi unha sorpresa de última hora. E facendo memoria, creo que poida ser o máximo histórico de formacións. En calquera caso, creo que os veciños limitarán a presenza no salón de plenos ás únicas tres candidaturas con posibilidades reais. Hai que superar o listón do 5 % dos votos, que andará preto de 800, e considero que só tres forzas o poderán facer finalmente.

—Que balance fai deste mandato?

—Foron catro anos moi singulares, invadidos por unha situación sanitaria que alterou tódolos plans de investimento e actuación. O covid requiriu dun gran esforzo por parte de tódalas Administracións e houbo que destinar recursos, en primeiro lugar, a tratar de salvagardar a saúde dos veciños. A partir de aí, intentamos manter un concello transformador e inversor, e continuar estendendo a rede de servizos.

—Algo que quedara no tinteiro que lamente especialmente?

—Sempre quedan cousas, e por ese motivo seguiremos traballando. O problema é que as Administracións locais dependemos especialmente doutras Administracións, como por exemplo na obtención de permisos sectoriais para levar a cabo obras ou proxectos. É o caso da travesía de Sísamo: está todo listo, pero Augas de Galicia aínda non contestou. Ou tamén da ampliación do polígono de Bértoa ou da circunvalación: dúas infraestruturas que traerían máis dinamismo económico e máis emprego.

—Cree que son cousas que serán realidade no próximo mandato?

—Espero que si, que a Xunta actúe con responsabilidade e atenda ás urxencias e necesidades.

—Que destaca do seu programa?

—Polo que coñezo, o BNG é o único que ten un programa completo: 36 páxinas con tódalas nosas liñas de actuación e mantendo esa visión 2030. O horizonte nunca debería ser inmediato, porque hai circunstancias que obrigan a planificar máis a medio prazo. Temos un programa transversal que abordará os principais problemas de Carballo: esas infraestruturas básicas, ese edificio para entidades sociais, a mellora das instalacións deportivas e culturais ou a expansión do ciclo integral da auga.

---

---

---